الماتىدا سىبايلاس جەمقورلىققا قارسى قىزمەت پەن قالا اكىمدىگى تاراپىنان سىبايلاس جەمقورلىق تاۋەكەلدەرىنىڭ الدىن الۋ جانە بيۋدجەتتىك قاراجاتتى باسقارۋدىڭ تيىمدىلىگىن ارتتىرۋ بويىنشا جۇيەلى جۇمىس جالعاسۋدا.
بۇل تۋرالى الماتى قالاسى بويىنشا سىبايلاس جەمقورلىققا قارسى ءىس-قيمىل اگەنتتىگىنىڭ دەپارتامەنت باسشىسى ارمان راحيموۆ وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا ايتتى، دەپ حابارلايدى aqshamnews.kz.
ماڭىزدى شارۋانىڭ ءبىرى - اكىم ەربولات دوسايەۆتىڭ تاپسىرماسىمەن قولعا الىنىپ، قالا ءماسليحاتى بەكىتكەن قالا قۇرىلىسى رەگلامەنتى مەن قۇرىلىسقا بايلانىستى جاڭا ەرەجەلەردىڭ كۇشىنە ەنۋى بولدى. بۇل قۇجاتتار ەكولوگياسى جاعىنان قالانىڭ تازا جانە ءقاۋىپسىز دامۋىن قامتاماسىز ەتۋگە باعىتتالعان.
«بۇل – قالانىڭ تاريحىندا العاش رەت قابىلدانىپ، 2025 جىلعى 1 ناۋرىزدان باستاپ كۇشىنە ەنگەن رەسمي قۇجاتتار. ولار قۇرىلىس سالاسىنداعى سىبايلاس جەمقورلىقتى جويۋعا باعىتتالعان»، – دەدى ارمان راحيموۆ.
ونىڭ ايتۋىنشا، جاڭا نورمالار قۇرىلىستىڭ تىعىزدىعى مەن بيىكتىگىن، جەر ۋچاسكەلەرىن پايدالانۋدى، سونداي-اق جاسىل ايماقتار مەن تابيعي لاندشافتاردى قورعاۋدى ناقتى رەتتەيدى. سيفرلىق قۇرالدار، ينتەراكتيۆتى كارتالار مەن اۆتوماتتاندىرىلعان راسىمدەردى ەنگىزۋ ادامي فاكتوردىڭ اسەرىن ەداۋىر ازايتۋعا مۇمكىندىك بەرەدى.
ارمان راحيموۆتىڭ مالىمەتىنشە، بيىل 12 نىسانعا قاتىستى شارالار قابىلدانعان، ولاردىڭ ەكەۋى تولىعىمەن نەمەسە ءىشىنارا بۇزىلعان. بۇلار – قۇرىلىس نورمالارىن بۇزىپ سالعان تۇرعىن ءۇي كەشەندەرى، كلۋب ۇيلەرى مەن قوناقۇيلەر.
سونىمەن قاتار، سپيكەردىڭ ايتۋىنشا، قالادا مەملەكەتتىك ساتىپ الۋ راسىمدەرىنە مونيتورينگ جۇرگىزۋ بويىنشا بەلسەندى جۇمىس جۇرگىزىلۋدە.
قالالىق موبيلدىلىك باسقارماسى جول جوندەۋ جۇمىستارىن كەلىسۋ الگوريتمىن ەنگىزىپ، كەپىلدىك مەرزىمىن ۇلعايتتى:
جاڭا جول قۇرىلىسىنا — 3 جىلدان 7 جىلعا دەيىن؛
ورتاشا جوندەۋگە — 3 جىلدان 5 جىلعا دەيىن.
«مۇنداي شارالار بىزگە جوبالاردى جۇزەگە اسىرۋ ساپاسىن ارتتىرىپ قانا قويماي، اشىقتىق پەن ەسەپتىلىك ارقىلى سىبايلاس جەمقورلىق تاۋەكەلدەرىن ازايتۋعا مۇمكىندىك بەرەدى»، – دەپ تۇيىندەدى ۆەدومستۆو باسشىسى.