الماتى قالاسىنىڭ اۋەزوۆ اۋدانىندا سۋمەن جابدىقتاۋ، كارىز جۇيەسى، جىلۋ، ەلەكتر جەلىلەرى مەن سىرتقى جارىقتاندىرۋدى قامتيتىن ينجەنەرلىك ينفراقۇرىلىمدى جاڭارتۋ جانە دامىتۋ باعىتىندا اۋقىمدى جۇمىستار جۇرگىزىلىپ جاتىر.
بۇل تۋرالى الماتى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا اۋدان اكىمى ابزال ەگەمبەردييەۆ حابارلادى.
اتاپ ايتقاندا، 2025 جىلدىڭ قاراشا ايىندا مامىر-4 شاعىن اۋدانىندا 12،3 شاقىرىم ينجەنەرلىك جەلىنىڭ (6،5 كم سۋمەن جابدىقتاۋ جانە 5،8 كم كارىز جۇيەسى) قۇرىلىسى اياقتالادى دەپ كۇتىلۋدە. جوبانى ىسكە اسىرۋ ناتيجەسىندە اۋداننىڭ 1 مىڭنان استام تۇرعىنى زاماناۋي كوممۋنالدىق قىزمەتكە تۇراقتى قول جەتكىزەتىن بولادى.
قۇرىلىس جۇمىستارى دوستىق شاعىن اۋدانىندا دا جالعاسۋدا. مۇندا 15،7 كم كارىز جەلىسى سالىنىپ جاتىر. جوبانىڭ جالپى قۇنى — 2،6 ملرد تەڭگە، اياقتالۋى بيىلعى قازان ايىنا جوسپارلانعان.
2025 جىلعى ەڭ ءىرى جوبالاردىڭ ءبىرى — ساين – جاندوسوۆ – قارعالى وزەنى – شالياپين كوشەلەرى اراسىنداعى اۋماقتا 49 كم ينجەنەرلىك جەلى (27 كم سۋ جانە 22 كم كارىز جۇيەسى) سالۋ. جوبا 3 مىڭنان استام تۇرعىندى ساپالى كوممۋنالدىق قىزمەتپەن قامتاماسىز ەتەدى.
جىلۋ جەلىلەرىن جاڭعىرتۋعا دا ەرەكشە كوڭىل بولىنۋدە. وتكەن جىلى «التس» ج ش س ساين، توقتابايەۆ، چەرەپانوۆ كوشەلەرى مەن مامىر-3 جانە 5-شاعىن اۋداندارىندا ۇزىندىعى 4،9 كم جىلۋ جەلىسىن قايتا جاڭارتتى. بۇل ۋچاسكەلەردە كوممۋنيكاسيالار سوڭعى 30 جىلدان استام ۋاقىت بويى جاڭارتىلماعان. اتالعان جۇمىستارعا 4،4 ملرد تەڭگە ينۆەستيسيا سالىندى. اعىمداعى جىلدىڭ تامىز ايىندا جەتىسۋ-2 شاعىن اۋدانىندا 1،1 كم جىلۋ جەلىسىن جاڭارتۋ جوباسى اياقتالادى دەپ جوسپارلانعان.
اۋدانداعى وزەكتى ماسەلەلەردىڭ ءبىرى — ەلەكتر جەلىلەرىنىڭ توزۋى. قازىرگى تاڭدا ولاردىڭ توزۋ دەڭگەيى 63%-دى قۇرايدى، بۇل ءجيى اپاتتىق وشىرۋلەرگە سەبەپ بولۋدا: 2023 جىلى — 245، 2024 جىلى — 232، ال 2025 جىلدىڭ وزىندە 187 جاعداي تىركەلگەن. اپاتتىق جاعدايلاردى ازايتۋ ماقساتىندا بيىل «اجك» اق 36،3 كم ەلەكتر جەلىسىن جانە 49 ترانسفورماتورلىق قوسالقى ستانسيانى قايتا جاڭعىرتادى. جوبانىڭ جالپى قۇنى — 120،4 ملن تەڭگە.
سونداي-اق سىرتقى جارىقتاندىرۋ جۇيەسىن جاقسارتۋ باعدارلاماسى بەلسەندى تۇردە جۇزەگە اسىرىلۋدا. بيىل قوسىمشا 52 كم كابەل قالپىنا كەلتىرىلىپ، 487 باعان ورناتىلىپ، 2 500-دەن استام شام جاڭاسىنا اۋىستىرىلادى.
بۇدان بولەك، كوشە جارىعىن ورناتۋ جوباسى اياسىندا 2025 جىلدىڭ تامىزىنا دەيىن جارىقتاندىرىلماعان 81 ۋچاسكەدە 824 باعان ورناتۋ جوسپارلانعان.