ەلىمىزدە 2020 جىلى ۇكىمەت قاۋلىسىمەن 10 تامىز - اباي كۇنى دەپ بەلگىلەندى.
وسى اتاۋلى كۇننىڭ قۇرمەتىنە الماتىداعى وڭىرلىك كوممۋنيكاسيالار قىزمەتى الاڭىندا اباي قۇنانبايەۆتىڭ 177 جىلدىعىنا ارنالعان ونلاين باسپا ءسوز ءماسليحاتى ءوتتى، دەپ حابارلايدى Almaty-akshamy.kz.
وندا ءال-فارابي اتىنداعى قازۇۋ جانىنداعى اباي عىلىمي-زەرتتەۋ ينستيتۋتىنىڭ جەتەكشى قىزمەتكەرى، فيلولوگيا عىلىمدارىنىڭ كانديداتى، دوسەنت ءلايلا مۇسالى ءسوز سويلەدى.
2009 جىلى قۇرىلعان اباي ينستيتۋتى ءوز جۇمىسىن ۇزدىكسىز جالعاستىرىپ كەلەدى. نەگىزگى باعىتى – ۇلى اقىننىڭ ءومىرى مەن شىعارماشىلىق مۇراسىن قوعامدىق گۋمانيتارلىق عىلىم سالالارىنىڭ توعىسىندا زەرتتەۋ. ينستيتۋتتىڭ اbai.kaznu.kz. ۆەب-سايتىندا عىلىمي-ادىستەمەلىك وقۋلىقتارىنىڭ مول قورى بار.
عزي ەلىمىزدە العاش رەت «ابايتانۋ. تاڭدامالى ەڭبەكتەر» اتتى 50 تومدىق جيناقتى قۇراستىرىپ شىقتى. تاڭدامالى ەڭبەكتەردىڭ 50 تومدىق باسىلىمى نەگىزىندە ىرىكتەلىپ «ابايتانۋ انتولوگياسىنىڭ» 10 تومدىعى دايىندالدى.
ءلايلا مۇسالىنىڭ ايتۋىنشا، "ابايتانۋ انتولوگياسى" – قوعامدىق-گۋمانيتارلىق عىلىمدار جۇيەسىندەگى، ابايتانۋ تاريحىنداعى ۇلكەن جەتىستىكتىڭ ءبىرى. «ابايتانۋ انتولوگياسىنا» م.اۋەزوۆ، ق.مۇقامەدجانوۆ، م.مىرزاحمەتوۆ، ر.سىزدىقوۆا، ز.احمەتوۆ، ج.ىسماعۇلوۆ، ت.ب. كورنەكتى ابايتانۋشىلاردىڭ ىرگەلى عىلىمي مونوگرافيالارى، ابايتانۋ سالاسىنداعى ىرگەلى ماسەلەلەردى عىلىمي تۇرعىدا پايىمدايتىن جەكەلەگەن زەرتتەۋلەر، ج.دادەبايەۆتىڭ «ابايدىڭ انتروپولوگيزمى» مونوگرافياسى، كەيبىر ءپانارالىق سيپاتتاعى ەڭبەكتەر ەنگەن.
سپيكەر سونداي-اق ابايتانۋ انتولوگياسى اتتى ينتەللەكتۋالدىق بازاسى اشىلعانىن جەتكىزدى. بۇل بازا قازاقستاننىڭ ءبىلىم جانە عىلىم جۇيەسى ءۇشىن، جالپى دۇنيەجۇزى قازاقتارىنا جول اشاتىن يگىلىكتى ۇلكەن بازاعا اينالۋى ءتيىس.
«مەملەكەت باسشىسى الداعى ۋاقىتتا گۋمانيتارلىق پاندەردىڭ بولىنبەس بولشەگى رەتىندە ابايتانۋ كۋرسىن وقىتۋ كەرەك دەپ ناقتى مىندەت قويدى. وسى باعىتتا قازۇۋ جانىندا اباي عىلىمي-زەرتتەۋ ينستيتۋتى ويشىل اقىننىڭ مۇراسى مەن ابايتانۋ بويىنشا ەڭبەكتەردى عىلىمي اينالىمعا ەنگىزۋ ماقساتىندا ناقتى جۇمىستار اتقارىپ كەلەدى. اباي ءىلىمىن ءبىلۋ جوباسى اياسىندا اباي توكسانومياسى ماسەلەسى كوتەرىلۋدە. اباي تاكسونومياسى اتتى جاڭا عىلىمي باعىتتى نەگىزدەپ جاتىرمىز. وسى جۇمىستاردىڭ اياسىندا تەك كازۇۋ-دە عانا ەمەس، بارلىق جوو-دا جالپى ءبىلىم بەرەتىن پاندەر قاتارىنا قوسۋدى ۇسىنامىز»، - دەدى ءلايلا مۇسالى.
ابايدىڭ قارا سوزدەرى بۇگىنگى كۇنى دە ماڭىزىن جويعان جوق. ورىس تىلىندە «قارا سوزدەردىڭ» ءۇش بىردەي نۇسقاسى بار. ابايدىڭ قارا سوزدەرى ءالى دە جىكتەلىپ، زەرتتەلىپ، تەرەڭىرەك ءمان-ماعىناسىن ۇعىنعان سايىن، بۇگىنگى زاماننىڭ ادامىن رۋحاني جاعىنان بايىتا تۇسەدى.
ءلايلا مۇسالى «پرەزيدەنتتىڭ «اباي – رۋحاني رەفورماتور» ماقالاسىندا ايتىلعان پايىمداۋلارعا ۇستازدار قاۋىمى وقىتۋ پروسەسى بارىسىندا ۇنەمى نازار اۋداراتىنىن جەتكىزدى.
«رۋحاني رەفورماتور دەگەن قوعامنىڭ ساناسىن العا جىلجىتۋشى دەگەن ماعىنانى بىلدىرتەتىنىن ۇمىتپايمىز. ماقالادا ايتىلعانداي، ابايدىڭ ايتقان بەس دۇشپان مەن بەس اسىل ءىستى ءبىلۋ كەرەك دەگەن ىرگەلى ويلاردىڭ ماڭىزى بار. ابايدىڭ تازا ۇلتتىق سيپاتتا جازىلعان شىعارمالارى ارقىلى مەملەكەتتىك ءتىلدى ۇيرەتۋدى قولعا الۋ كەرەك. ابايدىڭ ءبىر ولەڭىن جاتتاعان بالا، قازاقتىڭ ءسوزى مەن ولەڭىنىڭ قۇدىرەتىن تۇسىنۋگە جانە مەمەلەكەتتىك ءتىلدى جەتىك مەڭگەرۋگە وڭتايلى جول بولادى دەگەن پىكىرگە قوسىلامىز. اباي – ءبىزدىڭ رۋحاني دامۋداعى تەمىرقازىعىمىز بەن ۇلتتىق باعدارىمىز بولۋ كەرەك»، - دەپ قورىتىندىلادى سپيكەر.