اباي مەرەيتويى اياسىندا ءۇش ىرگەلى ەڭبەك جارىق كوردى، - دەپ حابارلايدى اqshamnews.kz ءتىلشىسى.
ۇلى اقىن ابايدىڭ 180 جىلدىعى اياسىندا بەس تۋىندى جارىق كوردى. كىتاپتار اقبەرەن ەلگەزەكتىڭ "اباي" باسپاسىنان جارىق كورگەن، تۇساۋى 9 تامىزدا سەمەيدەگى شاكارىم ۋنيۆەرسيتەتىندە وتكەن "ادامزاتتىڭ ابايى: رۋحانيات، پاراسات، تانىم" حالىقارالىق عىلىمي-تاجىريبەلىك كونفەرەنسياسىنىڭ اياسىندا كەسىلگەن.
"ابايدىڭ اۋدارما مەكتەبى" اتتى عىلىمي ەڭبەكتە قازاقتىڭ كاسىبي كوركەم اۋدارماسىنىڭ باستاۋى، جالعىز ءوزى تۇتاس ءبىر الەم جاساپ، شىعارماشىلىقپەن اينالىسقان نەبارى جيىرما جىلدىڭ ىشىندە قازاقتىڭ ءتىلىن دە، كوركەمدىك، ەتيكالىق تانىمىن دا كۇرت وزگەرتىپ، بۇرىن-سوڭدى تۇرىك جۇرتى جەتپەگەن بيىككە كوتەرگەن ابايدان تاعىلىم العان شاكەرىم قۇدايبەردى ۇلى، اسەت نايمانباي ۇلى، ءۋايىس شوندىباي ۇلى، تۇراعۇل اباي ۇلى، دانيال ىسقاقوۆتاردىڭ كوركەم اۋدارمالارىنا عىلىمي تۇرعىدا تەوريالىق، تەكستولوگيالىق تالداۋ جاسالعان. شاكەرىم، تۇراعۇل، دانيالدىڭ ومىرلەرىنە، قوعامدىق قىزمەتتەرىنە قاتىستى ارحيۆتە ساقتالعان تىڭ دەرەكتەر مەن ءتۇپنۇسقا قولجازبالار بەرىلگەن.
"دانيال ىسقاقوۆ شىعارمالارى" جيناعى – قازاقتان شىققان تۇڭعىش قارجىگەر، اعارتۋشى، اۋدارماشىنىڭ ادەبي مۇراسىن تۇتاس قامتىعان العاشقى باسىلىم. ول – كاكىتاي ىسقاقوۆتىڭ ۇلى، ابايدىڭ تۇڭعىش جيناعىن سانكت-پەتەربۋرگتەن شىڭعىستاۋعا جەتكىزگەن تۇلعا.
ءۇشىنشى ەڭبەك – "شەيىت" كىتابى. مۇندا ۇلى گۋمانيست، ويشىل شاكەرىم قۇدايبەردى ۇلىنىڭ ءومىرىنىڭ سوڭعى كەزەڭى، قازاعا ۇشىراۋى، وعان قاتىستى مۇراعات دەرەكتەرى مەن ەستەلىكتەر سالىستىرمالى زەرتتەۋ ارقىلى بەرىلگەن.
ال "حاليوللا" اتتى كىتاپتىڭ اۆتورى - اسەت مەدەۋحان ۇلى. ال احات شاھكارىم ۇلىنىڭ "جالىنعا مالعان جۇرەگىن" كىتابىن قۇراستىرۋعا اقىن مەرەي قارت جانە جاڭىل ادىلبەك قىزى اتسالىسقان.