الماتىدا اباي قۇنانبايەۆتىڭ 179 جىلدىعى قۇرمەتىنە وراي، رەسپۋبليكا سارايى الدىندا ەسكەرتكىشىنە گۇل شوقتارىن قويۋ ءراسىمى ءوتتى. بۇل ءىس-شاراعا الماتى قالاسى اكىمىنىڭ ورىنباسارى ازامات قالدىبەكوۆ، قازاقستان جازۋشىلار وداعى ءتوراعاسىنىڭ ورىنباسارى قاسىمحان بەگمانوۆ، ق ر پارلامەنتى ءماجىلىسىنىڭ دەپۋتاتتارى، الماتىداعى جۇڭگو حالىق رەسپۋبليكاسىنىڭ باس كونسۋلى سزيان ۆەي، جازۋشىلار، عالىمدار، قوعام قايراتكەرلەرى، ستۋدەنتتەر جانە قالا قوناقتارى قاتىستى، دەپ حابارلايدى aqshamnews.kz
قاسىمحان بەگمانوۆ ابايدىڭ شىعارماشىلىعى مەن رۋحاني مۇراسىنىڭ ۇرپاقتار اراسىنداعى ماڭىزدىلىعىن اتاپ ءوتتى. شارا بارىسىندا ستۋدەنتتەر ابايدىڭ ولەڭدەرىن جاتقا وقىپ، اقىننىڭ شىعارمالارىنا دەگەن سۇيىسپەنشىلىكتەرىن ءبىلدىردى.
كەيىنىرەك "ادامزاتتىڭ ابايى" اتتى جىر ءمۇشايراسى ءوتىپ، ابايدىڭ تانىمال شىعارمالارىنان ۇزىندىلەر وقىلدى، كىتاپتار مەن ەتنوونىمدەر كورمە-جارمەڭكەسى ۇيىمداستىرىلدى. اباي قۇنانبايەۆتىڭ فيلوسوفيالىق ويلارى مەن قازاق حالقىنىڭ رۋحىن بەينەلەيتىن شىعارمالارى قازاقستاننىڭ عانا ەمەس، بۇكىل الەمنىڭ مادەني مۇراسىنىڭ ءبىر بولىگى ەكەنى اتاپ ءوتىلدى.
ابايدىڭ تۋعان كۇنىنە وراي "الاتاۋ" ءداستۇرلى ونەر تەاترىندا "اباي الەمى" اتتى كونسەرت-سپەكتاكل ءوتتى. رەجيسسەر فارحاد ءمولداعاليدىڭ باسشىلىعىمەن بولات ءابدىلمانوۆ، ەرلان ءبىلال، نۇركەن وتەۋىل سىندى تانىمال اكتەرلەر ۇلى اقىننىڭ ومىرىنەن سىر شەرتىپ، شىعارماشىلىعىنداعى جاھاندىق تاقىرىپتاردى قوزعادى. كونسەرتتە "مۋزارت" توبى، ەردەن جاقسىبەك، IL Canto توبى، Steppe Sons توبى، ەرنار اماندىق جانە ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ حورى ونەر كورسەتتى.
الماتى قالاسىنىڭ وقۋ ورتالىقتارى مەن كىتاپحانالارىندا ابايدىڭ ولەڭدەرى مەن قارا سوزدەرىن مانەرلەپ وقۋ بايقاۋلارى ۇيىمداستىرىلدى. جالپى، الماتىدا 7-10 تامىز ارالىعىندا اباي كۇنىنە وراي 20-دان استام ءىس-شارا وتكىزىلەدى.
ەستەرىڭىزگە سالا كەتەيىك، اباي كۇنى 2020 جىلى قازاقستان رەسپۋبليكاسى ۇكىمەتىنىڭ قاۋلىسىمەن مەرەكەلىك داتاعا اينالدى.