قازاق سۋرەت ونەرىنىڭ كورنەكتى تۇلعاسى قايتىس بولدى
قازاق سۋرەت ونەرىنىڭ كورنەكتى تۇلعاسى، سۋرەتشى، كەسكىندەمەشى، قازاقستان سۋرەتشىلەر وداعىنىڭ مۇشەسى نۇربۇلان وتەپبايەۆ قايتىس بولدى، دەپ حابارلايدى aqshamnews.kz. قايعىلى اقپاراتتى اباي مۋزەيىنىڭ باسپا ءسوز قىزمەتى وكىلدەرى تاراتتى.
"قازاق رۋحانياتى ورنى تولماس قازاعا دۋشار بولدى. 73 جاسىندا قازاق سۋرەت ونەرىنىڭ كورنەكتى تۇلعاسى، سۋرەتشى، كەسكىندەمەشى، قازاقستان سۋرەتشىلەر وداعىنىڭ مۇشەسى وتەپبايەۆ نۇربۇلان نۇعىمان ۇلى دۇنيەدەن وتۋىنە بايلانىستى تۋعان-تۋىستارىنا، جاقىن-جۋىعىنا قايعىرا كوڭىل ايتامىز. نۇربۇلان نۇعىمان ۇلى سانالى عۇمىرىندا ۇلاعاتتى ۇستاز بولىپ سانالى شاكىرت تاربيەلەپ، سۋرەت ونەرىندە اباي تۇلعاسىن جەتە تانىتۋعا بارىن سالعان ايتۋلى قىلقالام شەبەرى. ونىڭ شىعارماشىلىق زەرتحاناسىنان شىققان قۇنانباي، اباي مەن ونىڭ اينالاسىنا قاتىستى سۋرەتتەر سەرياسىن تولتىرعان پورترەتتەرى، قازاق دالاسىنىڭ كورنىسى بەدەرلەنگەن كارتينالارى ەل رۋحانياتىمەن ماڭگى جاسارى انىق"، - دەلىنگەن حابارلامادا.