2024 جىل ەلىمىزدەگى ەڭ العاشقى مۋزىكالىق تەاتر ءۇشىن ەرەكشە ماڭىزعا يە - اباي اتىنداعى قازاق ۇلتتىق وپەرا جانە بالەت تەاترىنا 90 جىل. بيىلعى جىلدى تەك تەاتر ەمەس، الەمدىك ساحنادا وزىنە ءتان بەدەلى بار تەاتر ديريجەرى رەنات سالاۆات ۇلى سالاۆاتوۆتىڭ 75-جىلدىق مەرەيتويىمەن دە قارسى الدى، دەپ حابارلايدى aqshamnews.kz
2024 جىلدىڭ 10 قاراشاسىندا ماەسترو رەنات سالاۆاتوۆتىڭ مەرەيتويىنا وراي تەاتردا پ. ي. چايكوۆسكييدىڭ «يولانتا» وپەراسى قويىلدى. ديريجەرلىك پۋلت تىزگىنىندە مەرەيتوي يەسى – تاتار كسر-نىڭ حالىق ءارتىسى، قازاقستاننىڭ ەڭبەك سىڭىرگەن قايراتكەرى، رەسەيدىڭ ەڭبەك سىڭىرگەن ءارتىسى، تاتارستان رەسپۋبليكاسىنىڭ مەملەكەتتىك سىيلىعىنىڭ لاۋرەاتى، قۇرمانعازى اتىنداعى قازاق ۇلتتىق كونسەرۆاتورياسىنىڭ جانە قازاق ۇلتتىق ونەر ۋنيۆەرسيتەتىنىڭ قۇرمەتتى پروفەسسورى رەنات سالاۆاتوۆ ءوزى بولدى.
تەاتر ماەسترونى مەرەيتويىمەن قۇتتىقتاپ، تەاتردىڭ 90 جىلدىق مەرەيتويىنا ارنالعان ەستەلىك مەدال مەن ساعاتتى تابىس ەتتى.
سالاۆاتوۆ ەسىمى جوعارى دەڭگەيدەگى مۋزىكا مەن كلاسسيكالىق رەپەرتۋاردى تەرەڭ ءتۇسىنۋدىڭ ءسينونيمى. ماەسترومىزدىڭ رەپەرتۋارىندا ەۋروپالىق، ورىس، تاتار جانە قازاق كومپوزيتورلارىنىڭ 130-دان استام وپەرا، بالەت جانە سيمفونيالىق شىعارمالارى بار.
رەنات سالاۆاتوۆ اباي اتىنداعى قازاق ۇلتتىق وپەرا جانە بالەت تەاترىنىڭ سيمفونيالىق وركەسترىن ءارتۇرلى ۋاقىتتاردا باسقارعان. ول مۇسا جالەل اتىنداعى تاتار تەاترىنىڭ باس ديريجەرى. كەزىندە كەڭەس وداعىنىڭ ەڭ تانىمال وركەسترلەرىمەن، سونىڭ ىشىندە ۇلكەن تەاتر مەن ماريين تەاترىنىڭ وركەسترلەرىمەن بىرگە جەمىستى جۇمىس ىستەگەن.
پاريجدەگى گراند وپەرادا، دۋبلين بالەتىنىڭ وركەسترىمەن، لوندون وركەسترىمەن، سونداي-اق بولونيا، بيرمينگەم، سالەرنو، كەلن، دۋيسبۋرگ، سيەۆيليا، امستەردام، نيۋ-يورك قالالارىندا گاسترولدىك ساپارلارىمەن بارىپ، ونەر كورسەتىپ، كوپشىلىكتىڭ ىقىلاسىنا بولەنگەن. ماەسترو ون جىل بويى باۆاريا مەملەكەتتىك وپەراسىندا، ودان كەيىن شۆەسيانىڭ كورولدىك وپەراسىندا دا قىزمەت ەتتى.
«يولانتا» — گ. گەرستىڭ «رەنە پاتشانىڭ قىزى» دراماسىنا نەگىزدەلگەن، پەتر يليچ چايكوۆسكييدىڭ 1891 جىلى جازىلعان ەڭ سوڭعى ءارى ەڭ جارقىن وپەراسى. بۇل شىعارما ادامنىڭ ادالدىققا، شىنايى ازاتتىققا دەگەن ۇمتىلىسىن ايرىقشا بەينەلەيدى. سيۋجەت جەلىسى دۇنيەگە كەلگەن ساتىنەن كوز جانارىنان ايىرىلعان حانشايىم يولانتا اينالاسىندا ءوربيدى. ءوزىنىڭ كورۋ مۇمكىندىگى شەكتەۋلى ەكەنىن بىلمەگەن ول، باسقا ادامنىڭ كومەگىمەن ءومىر مەن ماحابباتتىڭ شىنايى ءمانىن تۇسىنەدى.
سپەكتاكل ارتىستەرى، اسىرەسە ماەسترو كەش سوڭىندا كورەرمەننىڭ ىستىق ىقىلاسىنا بولەندى. ال ءار قوناق وسى قايتالانباس ەموسيا مەن شاتتىق سەزىمى تاعى دا ۇزاعىراق سوزىلسا ەكەن دەگەن شىنايى تىلەكپەن شاپالاقتارىن ۇزاعىراق سوققان سەكىلدى.