ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي قارالدى، دەپ حابارلايدى almaty-akshamy.kz
دەنساۋلىق ساقتاۋ ءمينيسترى الەكسەي سوي قازاقستانداعى سانيتارلىق-ەپيدەميولوگيالىق جاعداي تۇراقتى ەكەنىن ايتتى. بارلىق وڭىرلەردە اۋرۋ دەڭگەيى، اۋىر جاعدايداعىلار مەن ستاسيونارلىق جانە امبۋلاتوريالىق ەم الىپ جاتقاندار سانى ايتارلىقتاي تومەندەدى.
ۆيرۋستىڭ رەپرودۋكتيۆتىلىك يندەكسى – 0،97. ينفەكسيالىق توسەك-ورىندار جۇكتەمەسى – 34%، رەانيماسيالىق توسەك-ورىندار جۇكتەمەسى – 29%. بۇگىنگى تاڭدا كوروناۆيرۋسقا قارسى ۆاكسينانىڭ ءبىرىنشى كومپونەنتىمەن 8 ملن استام ادام، ەكىنشى كومپونەنتىمەن 7،2 ملن جۋىق ادام ەگىلدى.
ۇجىمدىق يممۋنيتەتتىڭ 60%-ىنا قول جەتكىزۋ مىندەتى قويىلدى. كوروناۆيرۋستىڭ تارالۋ قارقىنى بويىنشا «جاسىل ايماقتا» شىمكەنت قالاسى، اقتوبە، تۇركىستان، جامبىل، ماڭعىستاۋ جانە قىزىلوردا وبلىستارى، «سارى ايماقتا» اتىراۋ، الماتى، قاراعاندى، باتىس قازاقستان جانە شىعىس قازاقستان وبلىستارى ورنالاسقان. «قىزىل ايماقتا» الماتى جانە نۇر-سۇلتان قالالارى، اقمولا، قوستاناي، پاۆلودار جانە سولتۇستىك قازاقستان وبلىستارى قالىپ وتىر.
قازاقستاندا تۇماۋعا قارسى ەگۋ ناۋقانى جالعاسۋدا. قازىرگى ۋاقىتتا 1،4 ملن قازاقستاندىق تۇماۋعا قارسى ەكپە الدى. ۇكىمەت باسشىسى كوروناۆيرۋس پەن تۇماۋعا قارسى ەگۋ ناۋقانىن جالعاستىرۋدى تاپسىردى.