تارازدىق تۇرعىن تۇزەۋ مەكەمەسىنە ەسىرتكى كىرگىزبەك بولدى

تارازدا تۇزەۋ مەكەمەسىنە ماريحۋانا كىرگىزبەك بولعان ازامات قۇرىقتالدى، دەپ حابارلايدى almaty-akshamy.kz Polisia.kz سىلتەمە جاساپ.

تارازدا تۇزەۋ مەكەمەسىنىڭ قىزمەتكەرلەرى تانىسىنا تىيىم سالىنعان زاتتى كىرگىزبەك بولعان ازاماتتى ۇستادى. انىقتالعانداي، 1979 جىلى تۋعان ت. رىسقۇلوۆ اۋدانىنىڭ تۇرعىنى سالەم-ساۋقات ارقىلى 170 تال تەمەكىگە جاسىرىلعان جاسىل ءتۇستى، وزىندىك ءيىسى بار وسىمدىك تەكتەس ۇنتاقتى ءوزىنىڭ تانىسىنا بەرمەك بولعان.

بۇل ءساتتى وڭىرلىك قاج دەپارتامەنتىنە باعىنىستى جد-158/2 مەكەمەسى جەدەل ءبولىمىنىڭ قىزمەتكەرلەرى قالت جىبەرگەن جوق. ازاماتتىڭ ايتۋىنشا، ول بۇل زاتتى مەكەمەدە جازاسىن وتەپ جاتقان 1977 جىلعى كورشىسىنە الدىن الا كەلىسۋى بويىنشا الىپ كەلگەن. ىزدەۋ بارىسىندا ەرەكشە ءيىسى بار تۇنىق جاسىل ءتۇستى وسىمدىك ءتارىزدى زات تاركىلەندى.

اتالعان دەرەك بويىنشا جەدەل تەرگەۋ توبى جانە تاراز قالالىق پوليسيا باسقارماسى ەسىرتكى قىلمىسىنا قارسى ءىس-قيمىل ءبولىمىنىڭ قىزمەتكەرلەرى شاقىرتىلىپ، سوت-حيميالىق ساراپتاما تاعايىندالدى. ناتيجەسىندە انىقتالعان زاتتىڭ كەپتىرىلگەن ماريحۋانا وسىمدىگى ەكەنى انىقتالدى. سونداي-اق، ۇستالعان ازاماتتىڭ قۇلان اۋىلىنداعى ءۇيىن ءتىنتۋ بارىسىندا وسىنداي ەسىرتكى زاتىنىڭ تاعى ءبىر بولىگى تابىلدى.