بۇگىن ءماجىلىستىڭ VIII شاقىرىلىمى ءۇشىنشى سەسسياسىنىڭ قورىتىندى وتىرىسى ءوتتى. پارلامەنت ءماجىلىسىنىڭ ءتوراعاسى ەرلان قوشانوۆ اتقارىلعان جۇمىستاردىڭ ناتيجەسىن ءبولىستى، - دەپ حابارلايدى اqshamnews.kz ءتىلشىسى.
"وسى سەسسيادا ءبىز 39 جالپى وتىرىس وتكىزدىك، 249 ماسەلە قاراپ، 90 زاڭ قابىلدادىق. سەسسيانىڭ اشىلۋىندا مەملەكەت باسشىسى قاسىم-جومارت كەمەل ۇلى توقايەۆتىڭ ءوزى ءداستۇرلى تۇردە دەپۋتاتتاردىڭ جۇمىسىنا سەرپىن بەرگەن بولاتىن. پرەزيدەنتتىڭ قازاقستان حالقىنا جولداۋلارىندا، سايلاۋالدى باعدارلاماسىندا، سونداي-اق ۇلتتىق قۇرىلتاي وتىرىستارىندا ايتىلعان باستامالارىن ىسكە اسىرۋ جالعاسىن تاپتى. دەپۋتاتتار ەڭ اۋەلى ازاماتتاردىڭ الەۋمەتتىك جاعدايىنا ەرەكشە ءمان بەرەدى.
بىرىنشىدەن، ءبىز مىندەتتى الەۋمەتتىك مەديسينالىق ساقتاندىرۋ جۇيەسىنە قاتىستى تاسىلدەردى قايتا قارادىق. بارلىق ازامات ءۇشىن، ءتىپتى ساقتاندىرىلماعان بولسا دا، العاش جۇگىنگەن كەزدە تەگىن بازالىق مەديسينالىق كومەكتىڭ ساقتالۋى ۇلكەن جەتىستىك بولدى. ءبىزدىڭ ۇسىنىسىمىز بويىنشا تەگىن مەديسينالىق كومەكتىڭ كەپىلدىك بەرىلگەن كولەمىنە ونكولوگيالىق سكرينينگتەر ەنگىزىلدى.
سونداي-اق، قۇلاعى ناشار ەستيتىن جانداردى، اسىرەسە بالالاردى جەرگىلىكتى بيۋدجەت قارجىسى ەسەبىنەن ەستۋ اپپاراتىمەن قامتاماسىز ەتۋ مۇمكىندىگى قاراستىرىلدى"، - دەدى ەرلان قوشانوۆ.
ءماجىلىس ءتوراعاسى بالالاردىڭ قۇقىقتارىن قورعاۋعا قاتىستى اتقارىلعان ىستەرگە توقتالدى.
"اتاپ ايتقاندا، كاسىبي وتباسى ينستيتۋتى ەنگىزىلدى. ەندى كاسىبي وتباسى قيىن جاعدايعا تاپ بولعان بالانى قامقورلىققا الادى، ونى بالالار ۇيىنە تاپسىرۋعا جول بەرمەيدى.
سونىمەن قاتار، دەپۋتاتتار جەكەمەنشىك وقۋ ورىندارىندا وقۋشىلارعا ىستىق تاماق بەرۋدى ۇيىمداستىرۋ جونىندەگى پروبلەمانى شەشتى. بۇل كوپ جىلدان بەرى شەشىمىن كۇتىپ وتىرعان ماسەلە ەدى. مەملەكەت باسشىسىنىڭ باستاماسىمەن ءبىز "كەلەشەك" ءبىرىڭعاي ەرىكتى جيناقتاۋ جۇيەسىنىڭ زاڭنامالىق نەگىزىن قالادىق.
جاڭا جيناقتاۋ جۇيەسىنىڭ ارقاسىندا بالالاردىڭ ساپالى ءبىلىم الۋىنا قوسىمشا مۇمكىندىكتەر بەرىلەدى. سونىمەن بىرگە، حالىقارالىق عىلىمي جارىستارعا قاتىسۋشىلاردىڭ ۇزدىكتەرى كونكۋرسسىز، سونىڭ ىشىندە "بولاشاق" باعدارلاماسى اياسىندا ءبىلىم گرانتتارىن الاتىن نورما ەنگىزىلدى"، - دەدى ول.
سونداي-اق، قىزمەتتىك مىندەتىن اتقارۋ كەزىندە قازا بولعان، ياعني اسىراۋشىسىنان ايىرىلعان 530 پوليسيا قىزمەتكەرىنىڭ وتباسىنا اي سايىنعى جاردەماقى تولەۋ ماسەلەسى شەشىلدى.
"ەكىنشىدەن، دەپۋتاتتاردىڭ قىزمەتىندەگى باستى باعىت "زاڭ مەن ءتارتىپ" قاعيداتىن زاڭنامالىق تۇرعىدان ودان ءارى ىسكە اسىرۋ بولدى. دەپۋتاتتار ەلىمىزدىڭ قىلمىس جازاسى كودەكستەرىن وڭتايلاندىرۋ بويىنشا ۇلكەن جۇمىس اتقاردى. ازاماتتاردى قىلمىستىق قاستاندىقتان قورعاۋعا باعىتتالعان زاڭدار قابىلداندى. جاعىمسىز الەۋمەتتىك قۇبىلىستارعا جاۋاپ رەتىندە ينتەرنەت-الاياقتىق جاساعانى ءۇشىن "دروپپەرلەرگە" قاتىستى قىلمىستىق جاۋاپكەرشىلىك كۇشەيتىلدى"، - دەدى ول.
دەپۋتاتتار نەكەگە تۇرۋعا ماجبۇرلەۋ ءىسى ءۇشىن دە جازا ەنگىزدى.
ادامنىڭ بەت-الپەتىن تانىپ-بىلۋگە كەدەرگى كەلتىرەتىن كيىم كيۋگە تىيىم سالىندى.
بۇعان قوسا، كونستيتۋسيانىڭ 30 جىلدىعى قارساڭىندا دەپۋتاتتار تاراپىنان راقىمشىلىق جاساۋ تۋرالى زاڭ ازىرلەنىپ، قابىلداندى.
راقىمشىلىق جاساۋ ارقىلى 15 مىڭ ازاماتتىڭ جازا مەرزىمى قىسقارتىلادى.
"ۇشىنشىدەن، زاڭ شىعارۋشىلاردىڭ باستى
مىندەتى – جاڭا ەكونوميكالىق ساياسات ءۇشىن بەرىك نەگىز قالىپتاستىرۋ. وسى سەسسيادا دەپۋتاتتار بيۋدجەتتىك-فيسكالدىق راسىمدەر تاسىلدەرىن تولىعىمەن قايتا قارادى. ءبىز قابىلداعان جاڭا بيۋدجەت كودەكسى ارقىلى بيۋدجەت پروسەسى ەداۋىر جەڭىلدەتىلىپ، ەكى ەسەگە دەيىن قىسقارتىلدى"، - دەدى ەرلان قوشانوۆ.
وسى سەسسيادا ەڭ قىزۋ تالقىلانعان قۇجاتتىڭ ءبىرى – سالىق كودەكسى.
دەپۋتاتتىق كورپۋس الدىندا تۇرعان ستراتەگيالىق مىندەت – مەملەكەتتىڭ، ازاماتتار مەن كاسىپكەرلەردىڭ مۇددەلەرى اراسىندا ورتاق مامىلە تابۋ بولدى.
"تورتىنشىدەن، پروگرەسسيۆتى سۋ ساياساتىن قالىپتاستىرۋ باعىتىنداعى جۇمىس تا بەلسەندى جالعاستى. قابىلدانعان سۋ كودەكسى قازاقستاندىقتار اراسىندا
سۋعا، ياعني تىرشىلىك كوزىنە ۇقىپتىلىقپەن قاراۋعا، ۇنەمدەۋ مادەنيەتىنىڭ قالىپتاسۋىنا باستاۋ بولارى انىق"
مەملەكەتتىك ورگانداردىڭ لاۋازىمدى قىزمەتكەرلەرى اتىنا 461 دەپۋتاتتىق ساۋال جولدانىپ، ازاماتتاردى تولعاندىرىپ جۇرگەن ەڭ وزەكتى ماسەلەلەر كوتەرىلدى.
بيىل تۇركىتىلدەس مەملەكەتتەردىڭ پارلامەنتتىك اسسامبلەياسىنا ءتوراعالىق ەتۋ كەزەگى قازاقستانعا ءوتتى.
بۇل – ەلىمىزدىڭ تۇركى ينتەگراسياسى ماسەلەلەرىندەگى جەتەكشى ءرولىنىڭ جانە وسى پروسەستە پارلامەنتتىك ديپلوماتيانىڭ ماڭىزدىلىعىنىڭ تاعى ءبىر دالەلى.
ەرلان قوشانوۆ كەلەسى سەسسيادا دا قابىلدانۋى كەرەك ءبىرقاتار ماڭىزدى زاڭعا توقتالدى.
"اتاپ ايتقاندا، قۇرىلىس كودەكسى، سونداي-اق قۇقىق بۇزۋدىڭ الدىن الۋ، تۇتىنۋشىلاردىڭ قۇقىقتارىن قورعاۋ، بانكتەر جانە بانك قىزمەتى تۋرالى، باسقا دا كوپتەگەن ماڭىزدى زاڭدار بار"، - دەدى ول.
ءسوز اياعىندا ءماجىلىس ءتوراعاسى بۇقارالىق اقپارات قۇرالدارىنا العىس ايتتى.