ازىق-تۇلىك قاۋىپسىزدىگىن قامتاماسىز ەتۋ ماقساتىندا.
2023 جىلدىڭ 21 قاڭتارىنا دەيىن ەلىمىزدەن ءتىرى ءىرى قارا، قوي جانە ەشكى شىعارۋعا تىيىم سالىندى. بۇل جايىندا ءماجىلىس دەپۋتاتتارىنىڭ ساۋالىنا ق ر پرەمەر-مينيسترىنىڭ ورىنباسارى – ساۋدا جانە ينتەگراسيا ءمينيسترى سەرىك ءجۇمانعاريننىڭ جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ازىق-تۇلىك قاۋىپسىزدىگىن قامتاماسىز ەتۋ ماقساتىندا 31 ءىس-شارانى كوزدەيتىن 2022-2024 جىلدارعا ارنالعان ازىق-تۇلىك قاۋىپسىزدىگىن قامتاماسىز ەتۋ جونىندەگى جوسپار قابىلداندى. بۇل جوسپار ازىق-تۇلىك تاۋارلارىنىڭ ناقتى جانە ەكونوميكالىق قولجەتىمدىلىگىن، تاماق ونىمدەرىنىڭ ساپاسى مەن قاۋىپسىزدىگىن قامتاماسىز ەتۋگە باعىتتالعان. جوسپار اياسىندا 230 ينۆەستيسيالىق جوبانى (2022 جىلى - 80 جوبا، 2023 جىلى – 85 جوبا، 2024 جىلى – 65 جوبا) ىسكە اسىرۋ ۇسىنىلدى. ولار 2024 جىلعا قاراي نەگىزگى يمپورتقا تاۋەلدى تاۋارلار (الما، بالىق، شۇجىق ونىمدەرى، ىرىمشىك جانە سۇزبە، قۇس ەتى) بويىنشا ەل حالقىن 100 پايىز قامتاماسىز ەتۋگە مۇمكىندىك بەرەدى»، - دەدى ول جاۋابىندا.
سونىمەن قاتار، سەرىك ءجۇمانعاريننىڭ اتاپ وتۋىنشە، 2023 جىلدىڭ 21 قاڭتارىنا دەيىن ءتىرى ءىرى قارا، قوي جانە ەشكى شىعارۋعا تىيىم سالىندى. 2022 جىلدىڭ سوڭىنا دەيىن قامىس شيكىزاتىن باجسىز اكەلۋگە كۆوتا قولدانىلادى. سونداي-اق، اكىمدىكتەر مۇددەلى مەملەكەتتىك ورگاندارمەن بىرلەسىپ، الەۋمەتتىك ماڭىزى بار ازىق-تۇلىككە 15 پايىز ساۋدا ۇستەمەسىنىڭ ساقتالۋىنا مونيتورينگ جانە باقىلاۋ جۇرگىزەدى.
«ءموراتورييدىڭ قولدانىلۋ كەزەڭىندە تەكسەرۋلەر جۇرگىزۋ بويىنشا ءتيىستى ۇسىنىمدار ازىرلەندى. ماسەلەن، ءامات-قا ساۋدا ۇستەمەسىن اسىرعانى ءۇشىن وسى جىلى 259 اكىمشىلىك حاتتاما جاسالدى. وعان حالىقتىڭ شاعىمدارى نەگىز بولدى. تەكسەرۋلەرگە قوسىمشا ساۋدا سۋبەكتىلەرىمەن ءتۇسىندىرۋ جۇمىستارى جۇرگىزىلەدى جانە زاڭنامالىق نورمالاردىڭ بۇزىلۋىنا جول بەرمەۋ بويىنشا ازىرلەنگەن جادىنامالار جىبەرىلەدى»، - دەدى مينيستر.