2030 جىلعا قاراي ءسۇت پەن ەت ونىمدەرى تۇتىنۋ سەبەتىنەن الىنىپ تاستالادى، دەلىنگەن تانىمال Telegram ارناسىنداعى اقپاراتتا.
بۇل دەف باستاماسى، ال ەكسپەريمەنت «C40 Cities» دەپ اتالادى ەكەن. Stopfake.kz ماسەلەنىڭ ءمان-جايىن انىقتادى، دەپ حابارلايدى Almaty-akshamy.kz.
الدىمەن «C40 Cities» جوباسى الەمنىڭ قىرىققا جۋىق ءىرى قالاسىن قامتىدى. ونىڭ باستى مىندەتى – كليماتتىق داعدارىسپەن كۇرەسۋ جانە 2030 جىلعا قاراي كومىرقىشقىل گازىنىڭ نولدىك شىعارىندىلارىنا قول جەتكىزۋ.
بۇگىنگى تاڭدا «C40 Cities» جوباسىنا 100-گە جۋىق قالا قاتىسادى. دۇنيەجۇزىلىك ەكونوميكالىق فورۋم دا جوبانىڭ باستامالارىن قولدايدى، فورۋمنىڭ رەسمي سايتىندا سىلتەمە دە بار. ءبىراق C40 دەف-تىڭ قۇرامىنا كىرمەيدى، ولاردىڭ اراسىندا تىكەلەي بايلانىس جوق. دەف-تىڭ مەديا ءبولىمىنىڭ باسشىسى يانن سوپف وسىنداي مالىمدەمە جاسادى.
«دۇنيەجۇزىلىك ەكونوميكالىق فورۋم سانى ارتىپ كەلە جاتقان پلانەتا حالقىن قالاي تۇراقتى جانە ءنارلى تاماقتاندىرۋ كەرەكتىگى تۋرالى ويلانۋعا ىقپال ەتكەنىمەن، ءبىزدىڭ ۇيىم ادامداردىڭ تاماعىن شەكتەۋدى جوسپارلاپ وتىرعان جوق»، – دەدى ول.
2019 جىلدىڭ ماۋسىم ايىندا «1،5°C جىلىنۋمەن الەمدەگى قالالىق تۇتىنۋدىڭ بولاشاعى» اتتى ەسەپ شىقتى. ونىڭ اۆتورى – Arup كونسالتينگتىك فيرماسى، «C40 Cites» جوباسى جانە ليدس ۋنيۆەرسيتەتى. بۇل جوسپار دا ەمەس، ساياسي ۇسىنىستار دا ەمەس.
ەسەپتە ەتتى از جەۋدىڭ پارنيكتىك گازدار شىعارىندىلارىنا قالاي اسەر ەتەتىنى تالدانعان. ستاتيستيكالىق مالىمەتتەرگە سايكەس، 2017 جىلى ازىق-تۇلىكپەن بايلانىستى شىعارىندىلار C40 قالالارىنداعى جالپى شىعارىندىلاردىڭ 13% قۇراعان. بۇل شىعارىندىلاردىڭ تورتتەن ءۇش بولىگى جانۋارلاردان الىناتىن ونىمدەردى تۇتىنۋمەن بايلانىستى.
ساراپشىلار تاماقتانۋعا قاتىستى بەس ءتۇرلى شارانىڭ ۇلگىسىن جاسادى. سوڭعىسى – ەڭ ءورشىل. بۇل ەت پەن ءسۇت ونىمدەرىن مۇلدەم تۇتىنباۋ، كۇنىنە 2500 كالوريا جانە ۇيدە تاماق قالدىقتارى بولمايدى.
زەرتتەۋ اۆتورلارىنىڭ ايتۋىنشا، ەسەپ C40 قالالارىندا وسى ماقساتتاردىڭ بارلىعىن جاپپاي قابىلداۋعا شاقىرمايدى. بۇل شىعارىندىلاردى ازايتۋدىڭ ءارتۇرلى بالامالارىن قاراستىرعان كەزدە ەسكەرۋگە بولاتىن نۇسقاۋلار.
«C40 Cites» جەلىسىنىڭ وكىلىنىڭ سوزىنشە، ادامدار جەكە ءومىر ءسۇرۋ سالتىن وزدەرى تاڭداۋى كەرەك. نە جەپ، نە قوياتىندارىن وزدەرى بىلەدى.
دەف «C40 Cites» قۇرامىنا كىرەتىن ەلدەردى ازىق-تۇلىك سەبەتىنەن ەت پەن ءسۇتتى الىپ تاستاۋعا شاقىرادى دەپ ايتۋعا نەگىز جوق. ءاربىر ەل جاھاندىق جىلىنۋمەن قالاي كۇرەسەتىنىن جانە بولاشاقتا قانداي ازىق-تۇلىكتەن باس تارتاتىنىن ءوزى شەشەدى.