ۇكىمەت 2026 جىلعى بيۋدجەتتىڭ نەگىزگى باعىتتارىنا قانشا قاراجات بولىنەتىنىن انىقتادى، - دەپ حابارلايدى aqshamnews.kz ءتىلشىسى.
پارلامەنت ءماجىلىسىنىڭ جالپى وتىرىسىندا قارجى ءمينيسترى ءمادي تاكييەۆ 2026-2028 جىلدارعا ارنالعان رەسپۋبليكالىق بيۋدجەت شىعىستارىنىڭ نەگىزگى پارامەترلەرىن قاراۋ كەزىندە ۇكىمەت ازاماتتاردىڭ ءومىر ءسۇرۋ ساپاسى مەن ەكونوميكانىڭ ورنىقتى دامۋىنا باسىمدىق بەرە وتىرىپ، الەۋمەتتىك باعدارلانعان باعىتتى جالعاستىراتىنىن اتاپ ءوتتى.
ماسەلەن، قارجى مينيسترلىگىنىڭ مالىمەتىنشە، دەنساۋلىق ساقتاۋ سالاسىنا 2،7 ترلن تەڭگە قاراستىرىلعان. بيىلمەن سالىستىرعاندا بۇل قاراجات 107 ملرد تەڭگەگە ارتىق. بۇل مەديسينالىق قىزمەتتەردىڭ قولجەتىمدىلىگىن ارتتىرۋعا مۇمكىندىك بەرەدى.
ءبىلىم جانە عىلىم سالاسىنا 901،7 ملرد تەڭگە جوسپارلانعان. ءبىلىم بەرۋ پروسەسىنىڭ ساپاسىن جاقسارتۋ، دارىندى جاستاردى قولداۋ جانە عىلىمي ورتالىقتاردى دامىتۋ بويىنشا باسىمدىقتار ساقتالدى.
2026 جىلى مادەنيەت، تۋريزم جانە سپورتتى دامىتۋعا 263،5 ملرد تەڭگە قاراستىرىلعان. مەملەكەت باسشىسىنىڭ تۇراقتى ەكونوميكالىق ءوسۋدى قامتاماسىز ەتۋ جونىندەگى تاپسىرماسىن ورىنداۋ ماقساتىندا مەملەكەتتىك قولداۋ شارالارىنا كەشەندى تالداۋ جۇرگىزىلدى.
2026 جىلى ەكونوميكانى ىنتالاندىرۋعا شامامەن 1،2 ترلن تەڭگە جوسپارلاندى، ال ناقتى سەكتوردى دامىتۋعا جۇمسالاتىن قاراجاتتىڭ جالپى كولەمى 540 ملرد تەڭگەگە ارتىپ، 3،7 ترلن تەڭگە بولماق. بۇل شارالار جاڭا سالالىق ءوسۋ درايۆەرلەرىن ىسكە قوسۋعا جانە ەلدىڭ ينۆەستيسيالىق الەۋەتىن نىعايتۋعا مۇمكىندىك بەرەدى.
نەگىزگى باسىمدىقتاردىڭ ءبىرى وڭىرلەردى دامىتۋ بولىپ قالا بەرەدى. وڭىرلەردى دامىتۋعا 2026-2028 جىلدارعا 581 ملرد تەڭگە قاراستىرىلعان، ونىڭ ىشىندە 2026 جىلى - 300 ملرد تەڭگە. بۇل جوبالار اسا ماڭىزدى جانە جالپىحالىقتىق ماڭىزعا يە. اكىمدىكتەردىڭ دەربەستىگىن ارتتىرۋ ماقساتىندا 2026 جىلى وڭىرلەرگە ترانسفەرتتەر ارقىلى 5،1 ترلن تەڭگە باعىتتالادى.
كۇشتىك قۇرىلىم بلوگىنا 2026 جىلى 3 ترلن تەڭگە بولىنەدى، بۇل بيىلمەن سالىستىرعاندا 335 ملرد تەڭگەگە ارتىق. وسىلايشا، 2026 جىلى قورعانىس شىعىندارى - ءجىو-نىڭ 1%-ى.
قاراجات تەك جاۋىنگەرلىك دايىندىقتى قولداۋعا عانا ەمەس، سونىمەن قاتار جۇيەلىك يننوۆاسيالاردى ىسكە اسىرۋعا دا جۇمسالادى.