الماتى قالاسى وڭىرلىك كوممۋنيكاسيالار قىزمەتىنىڭ الاڭىندا قالا اكىمىنىڭ ورىنباسارى بەيبىت شاحانوۆ مادەنيەت جانە سپورت سالاسىنداعى جوبالاردىڭ جۇزەگە اسىرىلۋى تۋرالى حابارلادى.
اكىم ورىنباسارىنىڭ ايتۋىنشا، الماتىدا مادەنيەت سالاسىنىڭ ءۇش ءىرى نىسانىن جاڭارتۋ بويىنشا اۋقىمدى جۇمىستار جۇرگىزىلۋدە. ولاردىڭ قاتارىندا «رايىمبەك باتىر» مەموريالدىق كەشەنى دە جاڭارتىلماق، - دەپ حابارلايدى Aqshamnews.kz.
«بۇل جۇمىس مەموريالدى قالانىڭ جانە ەلدىڭ رۋحاني، تاريحي جانە مادەني ومىرىندە ستراتەگيالىق ماڭىزى بار قازىرگى زامانعى مادەني-تاريحي جانە اعارتۋشىلىق ورتالىققا اينالدىرۋ ماقساتىندا جۇرگىزىلۋدە. جوندەۋ اياقتالعان سوڭ مەموريال قوعامدىق جانە رۋحاني شارالار وتكىزۋگە ارنالعان اشىق ءارى فۋنكسيونالدى الاڭعا اينالادى»، - دەدى بەيبىت شاحانوۆ.
بيىل ناۋرىز ايىندا ن.ساس اتىنداعى تەاتردىڭ كەشەندى جاڭارتىلۋى باستالدى. قاۋىپسىزدىك پەن جايلىلىقتى قامتاماسىز ەتۋ ءۇشىن قازىرگى زامانعى ينجەنەرلىك شەشىمدەر ەنگىزىلىپ، سونىمەن قاتار عيماراتتىڭ تاريحي كەلبەتى ساقتالادى. جاڭا عيمارات 226 زاماناۋي كورەرمەن ورنىنا يە بولىپ، تەاتردىڭ سىيىمدىلىعىن ايتارلىقتاي ارتتىرادى.
سونىمەن قاتار، قازاقستان جازۋشىلار وداعى عيماراتىنىڭ جاڭارتىلۋ جوباسى اياقتالۋعا جاقىن. جۇمىستاردىڭ اياقتالۋى 2026 جىلدىڭ باسىنا جوسپارلانعان. جاڭارتىلعان كەڭىستىك ۇلتتىق ادەبيەتتى دامىتۋ مەن مادەني بىرەگەيلىكتى نىعايتۋعا باعىتتالعان ادەبي، اعارتۋشىلىق جانە باسپا باستامالارىنا ارنالعان الاڭعا اينالادى.
قوسىمشا ءۇش جاڭا مادەني نىساننىڭ – جاستار تەاترىنىڭ، سيرك پەن زووباقتىڭ جوبالاۋ جۇمىستارى جۇرگىزىلۋدە. جاستار تەاترىنىڭ قۇرىلىسىن 2026 جىلدىڭ ناۋرىز ايىندا باستاۋ جوسپارلانۋدا.
بەيبىت شاحانوۆتىڭ ايتۋىنشا، الماتى ءداستۇرلى تۇردە ەلدىڭ سپورت كادرلارىن دايىندايتىن ورتالىق سانالادى، سوندىقتان سپورتتىق ينفراقۇرىلىمدى دامىتۋ باسىم باعىتتاردىڭ ءبىرى.
«بيىل ناۋرىزباي جانە تۇركسىب اۋداندارىندا وليمپيادالىق باسسەيندەرى بار ەكى جاڭا دەنە شىنىقتىرۋ-ساۋىقتىرۋ كەشەنىنىڭ قۇرىلىسىن باستاۋدى جوسپارلاپ وتىرمىز. كەلەسى جىلى تاعى ءتورت سپورت كەشەنىنىڭ قۇرىلىسى سايالى، اقجار، قاراسۋ جانە شۇعىلا شاعىناۋداندارىندا باستالادى»، - دەدى ول.
35 مىڭ كورەرمەنگە ارنالعان جاڭا فۋتبول ستاديونىنىڭ قۇرىلىسىنا ەرەكشە نازار اۋدارىلىپ وتىر. جاڭا ستاديوننىڭ UEFA-نىڭ 4-سانات تالاپتارىنا تولىقتاي ساي بولاتىنى دا ايتىلدى.
بۇدان بولەك، بيىل الماتىنىڭ سيمۆولىنا اينالعان «مەدەۋ» سپورت كەشەنىن جاڭارتۋ جۇمىستارى باستالدى. جاڭارتۋ جۇمىستارى ەكى جىلعا ەسەپتەلگەن. جاڭعىرتۋدان كەيىن «مەدەۋ» حالىقارالىق دەڭگەيدەگى سپورتتىق-تۋريستىك ورتالىق مارتەبەسىن ساقتاپ، كەلۋشىلەر ءۇشىن ودان ءارى تارتىمدى بولا تۇسەدى.