الماتى قالالىق قان ورتالىعىنىڭ (ققو) ديرەكتورى جاندوس ناديروۆ وڭىرلىك كوممۋنيكاسيالار قىزمەتىنىڭ بريفينگىندە قان قىزمەتىنىڭ 2024 جىلعى جۇمىس قورىتىندىسى تۋرالى ايتتى.
ققو ەلىمىزدەگى دوناسيالار سانى بويىنشا استانا قالاسىنداعى ترانسفۋزيولوگيا عىلىمي-وندىرىستىك ورتالىعىنان (ءعوو) جانە شىمكەنتتەگى ققو-نان كەيىنگى ءۇشىنشى ورىندا، دەپ حابارلايدى aqshamnews.kz.
ءبىر جىل ىشىندە 19788 قان دوناسياسى جۇرگىزىلدى، 15659 ليتر دونورلىق قان دايىندالدى جانە 38607 دوزا قان كومپونەنتتەرى بەرىلدى.
سپيكەردىڭ مالىمەتىنشە، قان كومپونەنتتەرىن ءبىر جىلدا 8665 پاسيەنت العان، ال ترانسفۋزيالاردىڭ جالپى سانى 37347ء-نى قۇراعان.
ناديروۆتىڭ ايتۋىنشا، جۇمىستىڭ ماڭىزدى بولىگى جىلجىمالى كونتەينەرلەرمەن بارىپ قان تاپسىرۋ بولدى، ولار جالپى ساننىڭ 38،1%ء-ىن قۇرادى. مۇنداي ءىس-شارالار اسكەري بولىمدەردە، جەكە جانە مەملەكەتتىك ۇيىمداردا، سونىڭ ىشىندە حالىق لايفتە، ياندەكستە جانە باسقا دا ورىنداردا وتكىزىلەدى.
«جىلجىمالى قان تاپسىرۋ ساپارلارى تۋرالى باق-تا جاريالانىپ، الەۋمەتتىك جەلىلەردە بەلسەندى تۇردە حابارلانادى. ءبىز دونورلىققا ادامداردى كوپتەپ تارتۋعا تىرىسامىز، ويتكەنى ءاربىر قان تاپسىرۋشى ءۇش ادامنىڭ ءومىرىن ساقتاپ قالۋى مۇمكىن»، - دەپ اتاپ ءوتتى ققو ديرەكتورى.
ونىڭ دەرەكتەرى بويىنشا دونورلاردىڭ نەگىزىن الماتى تۇرعىندارى قۇرايدى -70%، ال 30%-ى وبلىستان كەلەدى. دونورلاردىڭ جارتىسى - 18 بەن 35 جاس ارالىعىنداعى جاستار.
«دونورلىق – بۇل مۇقتاج ادامدارعا كومەكتەسۋ عانا ەمەس، سونىمەن قاتار دەنساۋلىقتى قالىپتا ۇستاۋ ءتاسىلى. ءبىز جىلىنا كەم دەگەندە ءبىر رەت قان تاپسىرۋدى ۇسىنامىز»، - دەدى ول.
ناديروۆ قالالىق قان ورتالىعى دونورلىق مادەنيەتتى دامىتۋدى جالعاستىرا وتىرىپ، قالا جانە وبلىس تۇرعىندارىنىڭ دەنساۋلىعى مەن ءومىرىن ساقتاپ قالۋعا ۇلەس قوساتىنىن ايتتى.