شۇجىق ونىمدەرىن تۇتىنۋ دەمەنسيا (اقىل-ەستىڭ كەمىستىگى) ءقاۋپىن 13-14%-عا ارتتىرادى، دەپ حابارلايدى Aqshamnews.kz The Washington Post سىلتەمە جاساپ.
عالىمداردىڭ مالىمەتىنشە، كۇنىنە نەبارى 21 گرامم وڭدەلگەن ەت تۇتىنۋ (شامامەن ءبىر ءتىلىم شۇجىق نەمەسە جارتى سوسيسكا) ەستە ساقتاۋ قابىلەتىنىڭ ناشارلاۋى جانە كوگنيتيۆتى فۋنكسيالاردىڭ تومەندەۋى سياقتى ماسەلەلەردىڭ پايدا بولۋىنا اكەلۋى مۇمكىن. بۇل اسىرەسە ەگدە جاستاعى ادامدار ءۇشىن ۇلكەن ءقاۋىپ توندىرەدى.
ماماندار وڭدەلگەن قىزىل ەت مولشەرىن ازايتىپ، ونى پايدالى اقۋىز كوزدەرىمەن الماستىرۋدى ۇسىنادى. اتاپ ايتقاندا:
- تاۋىق ەتى،
- بالىق،
- جاڭعاقتار،
- مايى از ءسۇت ونىمدەرى،
- بۇرشاق داقىلدارى.
بۇل ونىمدەر ادام اعزاسىنا قاجەتتى اقۋىزدى قامتاماسىز ەتىپ قانا قويماي، ەستە ساقتاۋ جانە ويلاۋ قابىلەتتەرىنىڭ ساقتالۋىنا كومەكتەسەدى.
وڭدەلگەن ەت ونىمدەرى قۇرامىندا ناتريي، قانىققان مايلار جانە حيميالىق كونسەرۆانتتار كوپ مولشەردە بولادى. بۇل زاتتار ميدىڭ قان اينالىمىنا تەرىس اسەر ەتىپ، نەيرونداردىڭ جۇمىسىن ناشارلاتۋى مۇمكىن. سونىمەن قاتار، زەرتتەۋلەردىڭ ناتيجەلەرى كورسەتكەندەي، مۇنداي تاعامداردى ۇزاق ۋاقىت بويى ءجيى تۇتىنۋ السگەيمەر سياقتى اۋىر اۋرۋلاردىڭ دامۋ ىقتيمالدىعىن ارتتىرادى.
دۇرىس تاماقتانۋ – دەنساۋلىقتىڭ كەپىلى. كۇندەلىكتى راسيونىڭىزعا ءمان بەرىپ، وڭدەلگەن ەت ونىمدەرىن تابيعي جانە پايدالى تاعامدارعا اۋىستىرۋ ارقىلى ەستە ساقتاۋ قابىلەتىڭىزدى جانە جالپى ميدىڭ قىزمەتىن جاقسارتا الاسىز. عالىمداردىڭ بۇل ەسكەرتۋىن ەلەۋسىز قالدىرماۋ – سالاۋاتتى ءومىر ءسۇرۋدىڭ ماڭىزدى قادامى.