ەلىمىزدە 373 مىڭ وقۋشى ورنىنا ارنالعان 257 مەكتەپتىڭ قۇرىلىسى اياقتالدى.
بۇل ءۇش اۋىسىمدى 42 مەكتەپتىڭ جانە 148 ەلدى مەكەندە ورنالاسقان 20 اپاتتى مەكتەپ پەن ورىن تاپشىلىعى ماسەلەسىن شەشۋگە مۇمكىندىك بەردى. بۇل تۋرالى aqshamnews.kz ق ر وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ حابارلايدى.
ءۇش اۋىسىمدى وقىتۋ جانە اپاتتى مەكتەپتەر ماسەلەسىن شەشۋ بويىنشا بيۋدجەت قاراجاتى ەسەبىنەن جانە ينۆەستيسيا تارتا وتىرىپ جۇيەلى جۇمىستار جۇرگىزىلۋدە.
مەملەكەت باسشىسى باستاماشىلىق ەتكەن «جايلى مەكتەپ» ۇلتتىق جوباسى اياسىندا وقۋ جىلىنىڭ باسىنان 254 مىڭ وقۋشى ورنىنا ارنالعان 105 مەكتەپ پايدالانۋعا بەرىلدى، ونىڭ ىشىندە 40%-دان استامى اۋىلدىق جەرلەردە ورنالاسقان.
ءبىلىم بەرۋ ينفراقۇرىلىمىن قولداۋ قورى بويىنشا 27 مىڭ وقۋشى ورنىنا ارنالعان 25 مەكتەپ قولدانىسقا بەرىلدى. قوسىمشا تاعى بەس مەكتەپ پەن 3،3 مىڭ ورىندىق ينتەرنات قۇرىلىسى جۇرۋدە. ءبىلىم بەرۋ نىساندارى قۇرىلىسىنىڭ باسىم بولىگى جەتىسۋ، قىزىلوردا، باتىس قازاقستان، اقمولا وبلىستارىندا جانە الماتى قالاسىندا سالىنۋدا. بۇل جوبالاردى ىسكە اسىرۋ مەكتەپتەر مەن ينتەرناتتارداعى وقۋشى ورىندارىنىڭ تاپشىلىعىن قىسقارتۋعا، سونداي-اق ءبىر مەكتەپتە اپاتتى عيمارات ماسەلەسىن شەشۋگە مۇمكىندىك بەرەدى. بارلىعى جەمقورلاردان تاركىلەنگەن قاراجات ەسەبىنەن جالپى سانى 100 مىڭ وقۋشى ورىندىق 89 مەكتەپتىڭ قۇرىلىسى قارجىلاندىرىلدى.
سونداي-اق رەسپۋبليكالىق جانە جەرگىلىكتى بيۋدجەت قاراجاتى مەن جەكە ينۆەستيسيالار تارتۋ ەسەبىنەن 92 مىڭ وقۋشى ورنىنا ارنالعان 127 مەكتەپ قۇرىلىسى جۇرگىزىلدى.
جاڭا نىسانداردى ىسكە قوسۋمەن قاتار قولدانىستاعى ينفراقۇرىلىمدى جاقسارتۋ بويىنشا دا اۋقىمدى جۇمىستار جۇرگىزىلدى:
• 254 ورتا وقۋ ورنى كۇردەلى جوندەۋدەن ءوتتى؛
• 967 مەكتەپكە ارنالعان 1621 زاماناۋي پاندىك كابينەت ساتىپ الىندى؛
• زاماناۋي ستاندارتتارعا سايكەس 1 مىڭ اۋىل مەكتەبى جاڭعىرتىلدى؛
• 10 مىڭنان استام ءبىلىم بەرۋ ۇيىمىنىڭ قاۋىپسىزدىك جۇيەلەرىمەن تەحنيكالىق جاراقتاندىرىلۋى جاقسارتىلدى.
ايتا كەتەيىك، مەملەكەت جىل سايىن مەكتەپتەردى سالۋعا جانە جاڭعىرتۋعا قاراجات ءبولىپ كەلەدى. جاڭا نىساندار قۇرىلىسى ءۇش اۋىسىمدى 42 مەكتەپتىڭ، 148 ەلدى مەكەندە ورنالاسقان 20 اپاتتى مەكتەپ پەن وقۋشى ورىنىنىڭ تاپشىلىعى ماسەلەسىن شەشۋگە مۇمكىندىك بەردى.