ايگەرىم ورازبەك - الماتى قالاسىنىڭ تۋماسى. بۇگىندە ول تۇركيانىڭ انتاليا قالاسىندا ءقوناقۇي سالاسىندا قىزمەت ەتىپ ءجۇر. 29 جاستاعى پوليگلوت قازاق تىلىمەن قوسقاندا 15 ءتىلدى ەركىن مەڭگەرگەن. جەلىدە ونىڭ ءبىر ۋاقىتتا بىرنەشە تىلدە ەركىن سويلەگەن ۆيدەوسى تارالىپ، كوپشىلىك نازارىن وزىنە اۋداردى. Aqshamnews.kz ءتىلشىسى ايگەرىممەن تىلدەسىپ، كوپ ءتىل ۇيرەنۋدىڭ سىرى مەن قازىرگى ءومىرى تۋرالى سۇراپ ءبىلدى.
كينو سالاسىنان تۋريزمگە دەيىنگى جول
ايگەرىم تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ "كينو جانە تۆ" فاكۋلتەتىن ءتامامداعان. ستۋدەنتتىك جىلدارى ونىڭ وقۋ توبى "كوپتىلدى" بولعاندىقتان، ساباقتاردىڭ باسىم بولىگى اعىلشىن تىلىندە وتەتىن. ءتىل ۇيرەنۋگە مۇنىڭ دا كوپ سەپتىگى تيگەن سىڭايلى. ماماندىعى - كينو سالاسىنا قاتىستى بولعاسىن، ءوزىن بۇل قىرىنان دا ازدى- كوپتى سىناپ كورگەنى بار ەكەن.
“جەدەل جاردەم”، “اياۋلى ءۇمىت”، “سەزىم” سەكىلدى سەريالدارعا ەپيزود رولدەرگە ءتۇستىم. ءبىراق نەگىزىنەن كادر سىرتىندا سەناريست-رەداكتور بولىپ جۇمىس ىستەدىم"، - دەيدى ول.
ءقازىر ايگەرىم قازاق، ورىس، اعىلشىن، تۇرىك، قىرعىز، وزبەك، پولياك، يتاليا، كارىس، نەمىس، ازەربايجان تىلدەرىن ەركىن مەڭگەرگەن. دات، ۋكراين، تاي جانە جاپون تىلدەرىن دە جەتىك مەڭگەرگەن، دەگەنمەن ءالى دە تاجىريبە جۇزىندە دامىتۋ قاجەت دەيدى ءوزى.
پوليگلوتتىڭ ايتۋىنشا، ول بارلىق ءتىلدى ءوز بەتىنشە ۇيرەنگەن:
"بالا كۇنىمدە ينتەرنەت جوق، ءىشىم پىسادى. سول سەبەپتى كىتاپ، سوزدىك وقىپ كەتتىم. ورىسشانى 5-6 جاسىمدا ۇيرەندىم. 9 جاسىمدا تۇرىك سەريالدارىن كورەمىن دەپ تۇرىكشە مەڭگەرىپ كەتتىم. ايتەۋىر وسىلاي ءجۇرىپ ۇيرەنە باستادىم".
كوپ ءتىل ءبىلۋ تۋريزمگە جول اشقان
بۇگىندە ايگەرىم انتالياداعى بەس جۇلدىزدى قوناقۇيلەردىڭ بىرىندە رەسەپشن قىزمەتىن اتقارادى. قاجەت بولعاندا اۋدارماشىلىق مىندەتىن دە ءوز موينىنا الادى.
سۋرەت: كەيىپكەردىڭ جەكە مۇراعاتىنان
سوندىقتان ارىپتەستەرى ونى "قۇتقارۋشى" دەپ اتاپ كەتكەن. ويتكەنى ءار ەلدەن كەلگەن قوناقپەن سويلەسۋگە كەلگەندە ايگەرىمنىڭ ءتىل بىلمەي قالعان كەزى سيرەك.
جەلىدە تانىمال ەتكەن ۆيدەو قالاي پايدا بولدى؟
"مەن جۇمىس جاسايتىن كومپانيا قىزمەتكەرلەردەن ۆيدەوەسەپ تالاپ ەتەدى. سول ۆيدەولاردى Instagram-پاراقشاسىندا جاريالاپ وتىرادى. مەن دە جۇمىس ۇستىندە بىرنەشە روليك تۇسىرگەنمىن. ءبىر كۇنى پولياك جانە اعىلشىن قوناقتار قاتار كەلدى، بىرنەشە تىلدە سويلەستىم. ارىپتەستەرىم جاقسى شىقتى دەگەسىن، TikTok-قا سالا سالدىم. تاڭەرتەڭ تۇرسام 100 مىڭنان استام قارالىم جيناپ ۇلگەرىپتى. كەيىن ونى Instagram-عا باسقالار كوشىرىپ سالىپ، وسىلاي تاراپ كەتتى"، - دەيدى ايگەرىم.
ايگەرىم تۋريزم سالاسىندا تابىستى ەڭبەك ەتىپ جۇرگەنىمەن، نەگىزگى ماماندىعى بويىنشا دا ءوزىن سىناپ كورگىسى كەلەتىنىن جاسىرمايدى. Marvel جانە Netflix سەكىلدى ءىرى كينوكومپانيالاردىڭ بايقاۋلارىنا قاتىسىپ كورگەنىن ايتادى.
"ازىرگە ناقتى شەشىم جوق. بولاشاقتا قاي جولدى تاڭدارىم ۋاقىتقا بايلانىستى. تۋريزمدە دە ۇلكەن جوسپارلارىم بار – سالانى تەرەڭىرەك زەرتتەپ، تاجىريبەمدى ارتتىرعىم كەلەدى"، – دەيدى ول.
تەڭىز جاعاسىنداعى ءومىر - بالا كۇنگى ارمان
"جۇمىس جايلى، جالاقىسى جاقسى بولدى. ەڭ باستىسى – تەڭىز جاعاسىندا تۇرۋ بالا كۇنگى ارمانىم ەدى"، - دەيدى ايگەرىم.
كوپتەگەن ءتىل بىلگەنىنە قاراماستان، ول بۇل قابىلەتىن ەشقاشان جاريا قىلىپ، ماقتان تۇتپايدى. جەلىگە تارالعان ۆيدەو دا جاي جۇمىس بارىسىنداعى كادرلار عانا ەكەن.