جەلىدە 50 جىل وتاسقان جۇپتىڭ "التىن تويىنان" ۆيدەو تارادى. كەيىن وقىرماندار ولاردىڭ ءومىرى مەن بەرىك ماحابباتىنىڭ قۇپياسىنا قىزىعا باستادى. اqshamnews.kz ءتىلشىسى شارابايەۆتار وتباسىمەن سۇحباتتاستى.
الەۋمەتتىك جەلىدە باستى كەيىپكەرگە اينالعان احمەت اعا مەن رايحان اپا - كەربۇلاق اۋدانى، جاڭالىق اۋىلىنىڭ تۋمالارى. ولار ەكى ۇل، ءبىر قىز ءوسىرىپ، ولاردان التى نەمەرە ءسۇيىپ وتىر.
بۇدان 50 جىل بۇرىن 21 قاراشادا شاڭىراق كوتەرگەن جۇپ قالاي تانىسقانىن ايتىپ بەردى.
"ءبىر كورگەننەن عاشىق بولدىم"
"رايحان ول كەزدە دۇكەندە ساتۋشى بولىپ ىستەيتىن. ءبىر كورگەننەن عاشىق بولدىم. ءبىر جىل ءجۇرىپ، كەيىن وتباسىن قۇردىق. جاس وتباسىعا دەپ مەملەكەت 1975 جىلى ءۇي بەرىپ، "جاقسى جۇمىس ىستەڭدەر" دەپ سەنىم ارتقان. ءبىراق ءۇيدىڭ ىشىندە مۇلىك كوپ بولعان جوق: ءبىر ورىندىق، ەكى كەسە، ەكى تارەلكا، ءبىر توسەك قانا بولدى. سونىڭ وزىنە شۇكىر دەپ، وتباسىمىزدى قۇرىپ، سول ۇيدە تۇرا باستادىق، – دەيدى احمەت اتا.
"مەن جۇرگىزۋشى بولىپ ىستەدىم. تاڭنان كەشكە دەيىن رەيسكە كەتەمىن، راكەڭ (رايحان - ەسك.) دۇكەندە ىستەيدى. كەشكە ءبىرىمىز-بىرىمىزدى جۇمىستان كۇتىپ الامىز. شارشاپ كەلەمىز دە، "قيىن بولدى" دەپ ويلانبايمىز دا، تاماعىمىزدى ءىشىپ، ۇيىقتاپ قالامىز. ول كەزدە دۇكەن كەشكى 9-عا دەيىن ىستەيدى. سولاي ءجۇرىپ، ءومىرىمىز ءوتىپ جاتتى"، – دەيدى احمەت اتامىز.
العاشقى بالالارى دۇنيەگە كەلگەننەن كەيىن رايحان اپا بۋحگالتەرلىك وقۋعا ءتۇسىپ، ماماندىعىن دا اۋىستىرعان.
"ءبىرىنشى بالامىز ومىرگە كەلدى. كەيىن راكەڭ بۋحگالتەرلىككە وقۋعا ءتۇسىپ، تالعارعا بارىپ، بۋحگالتەر ماماندىعىن الىپ شىقتى. ودان كەيىن سەلسوۆەتتە (اۋىلدىق كەڭەستە - ەسك.) حاتشى بولىپ جۇمىس ىستەدى"، – دەيدى ول.
"بۇرىن ءشوپ شاباتىن ۋاقىتتا ءبىر اي بويى تىنىمسىز ەڭبەك ەتەتىنبىز. ءومىردىڭ ءوزى سونداي بولاتىن. قيىن، اۋىر جۇمىستان كەلەتىنىمىزدى بىلەتىن راكەڭ الدىن الا لاعمان ازىرلەپ قويادى. ءبىز ءشوپتى اكەلەمىز، ول ۇيدە لاعمانىن دايىنداپ، مونشا جاعىپ قويادى. جۇمىستان كەلگەندە الدىمەن مونشاعا ءتۇسىپ، شارشاعانىمىزدى باسىپ الامىز. ءبارى تاپ-تازا، دايىن تۇرادى. سودان كەيىن عانا وتىرىپ تاماق ىشەمىز دە، قايتادان جۇمىسقا كىرىسەمىز"، – دەيدى احمەت اعا.
50 جىل مەن "التىن توي"
الەۋمەتتىك جەلىدە ۆيدەوسى تاراعان "التىن توي" تۋرالى سۇراعانىمىزدا، بۇل يدەيانى رايحان اپا ۇسىنعانىن بىلدىك."باسىندا ءبىز التىن تويدى ۇيدە عانا، ازداعان اداممەن اتاپ وتەمىز دەپ جۇرگەنبىز. ءبىراق راكەڭ بالا-شاعامەن اقىلداسىپ، "بۇنداي مەرەكە اركىمنىڭ باسىنا كەلە بەرمەيدى، ءبىر دۇرىس قىلىپ تويلاپ تاستايىق" دەدى. كەيىن بالالارىمىز دا قولداپ، ءبارى جابىلىپ، ءبىر اۋىزدان ماقۇلدادى. تۋعان-تۋىس، قۇدا-قۇداعي، جولداستار، كورشى-قولاڭ، ءومىر بويى بىزبەن بىرگە بولعان جانداردىڭ ءبارى كەلسىن، ءبىزدىڭ ءومىرىمىزدىڭ قالاي وتكەنىن، قانداي وتباسى بولعانىمىزدى ءوز كوزدەرىمەن كورسىن دەپ ويلادىق. سول توي بالالارىمىزدىڭ، بۇكىل اۋلەتتىڭ بىزگە جاساعان ۇلكەن سىيى بولدى"، - دەيدى ولار.
ال اق كويلەك تويعا بىرنەشە ۋاقىت قالعاندا "بايسات" بازارىنان تابىلعان.
"كويلەكتى بايسات بازارىنا بارىپ، جالعا الدىق"، – دەيدى ەرلى-زايىپتىنىڭ قىزى.
بۇعان قوسا، جۇپتىڭ بالالارى اتا-اناسىن "بال ايىن" دۋبايدا قارسى السىن دەگەن نيەتپەن جولداما سىيلاعان.
50 جىل ءتۇتىن تۇتەتىپ، ءبىر شاڭىراق استىندا ءتاتۋ-تاتتى ءومىر ءسۇرۋدىڭ باستى سىرى قانداي؟ بۇل سۇراققا احمەت اتا جاۋاپ بەردى:
"50 جىل بىرگە تۇرۋ ءۇشىن ەڭ ماڭىزدىسى – ءتوزىم مەن شىدامدىلىق. ءبىرىڭدى-بىرىڭ تىڭداي ءبىلۋ كەرەك. ءبىرى قاتتى سويلەپ تۇرسا، ەكىنشىسى ۇندەمەي قالعان دۇرىس. قاتتى رەنجىسكەندە دالاعا شىعىپ، ءوز-وزىڭدى باسىپ كەلەسىڭ. اشۋ باسىلعاننان كەيىن راكەڭ مەنى شايعا شاقىرادى. شاي ءىشىپ وتىرىپ، سويلەسەمىز، ءبىراق سول ۇرىسقان اڭگىمەنى قايتا قوزعامايمىز. سونىڭ ءوزى ۇلكەن تاربيە ەكەن. سولاي-سولاي 50 جىل وتە شىعىپتى".
شارابايەۆتار اۋلەتىنىڭ اڭگىمەسى - بەرىك ماحابباتتىڭ، ەڭبەكتىڭ، سابىر مەن سىيلاستىقتىڭ، "اشۋدى شايمەن باساتىن" قازاقى دانالىقتىڭ ۇلگىسى.