اتىراۋ وبلىسىندا قارجىلىق مونيتورينگ اگەنتتىگى مەن پروكۋراتۋرانىڭ ۇيلەستىرۋىمەن ءبىرىڭعاي جيناقتاۋشى زەينەتاقى قورىنان (بجزق) 200 ملرد تەڭگەدەن استام قاراجاتتى زاڭسىز شەشۋگە قاتىسى بار قىلمىستىق توپ اشكەرەلەندى، دەپ حابارلايدى اqshamnews.kz ءتىلشىسى.
تەرگەۋ بارىسىندا بجزق قارجىسىن زاڭسىز يەمدەنۋگە كومەكتەسكەن 5 ۇيىمداسقان توپتىڭ ارەكەتى انىقتالدى. ولار جالعان قۇجاتتار جاساپ، اتىراۋ، استانا، الماتى، شىمكەنت، اقتاۋ جانە وزگە دە قالالاردا بار سياقتى ەتىپ 30-دان استام جالعان ستوماتولوگيالىق كلينيكا تىركەگەن.
انىقتالعانداي، بۇل كلينيكالار ءىس جۇزىندە حالىققا ەشقانداي قىزمەت كورسەتپەگەن: عيماراتتارى، جابدىقتارى جانە بىلىكتى ماماندارى بولماعان، ال باسشىلارىنىڭ مەديسينالىق ءبىلىمى دە جوق بولعان.
كۇدىكتىلەر ازاماتتاردىڭ زەينەتاقى اقشاسىن شەشىپ الۋ ءۇشىن جالعان مەديسينالىق قۇجاتتار راسىمدەپ، ودان 10–20 پايىز كولەمىندە زاڭسىز سىياقى الىپ وتىرعان. قاراجاتتى قولما-قول اقشاعا اينالدىرۋ ءۇشىن 226 دروپپەردى پايدالانعان. وسىلايشا 200 ملرد تەڭگەدەن استام قاراجات اينالىمنان شىعارىلعان.
بۇل اقشالارعا كۇدىكتىلەر جالپى قۇنى 600 ملن تەڭگەدەن اساتىن 15 قىمبات اۆتوكولىك (Mercedes-Benz G-class، GLE، BMW X7، Porsche Taycan، Cadillac Escalade) ساتىپ الىپ، سونداي-اق ەليتالىق پاتەرلەر، كوممەرسيالىق نىساندار، جەر تەلىمدەرى مەن زەرگەرلىك بۇيىمداردى يەمدەنگەن. قىلمىستىق جولمەن تابىلعان مۇلىكتى ىزدەستىرۋ جالعاسىپ جاتىر.
ءقازىر ءىس اياسىندا 59 ءتىنتۋ ءىسى جۇرگىزىلىپ، 10 ادامعا بۇلتارتپاۋ شاراسى قولدانىلدى.
"تەرگەۋ تەك زەينەتاقى اكتيۆتەرىن زاڭسىز شىعارۋ سحەمالارىن ۇيىمداستىرۋشىلاردىڭ ارەكەتتەرىنە باعا بەرەدى. ءوزىنىڭ جيناقتالعان زەينەتاقى قاراجاتىن العان ازاماتتار قىلمىستىق جاۋاپكەرشىلىككە تارتىلمايدى. بارلىق پروسەسسۋالدىق ارەكەتتەر قولدانىستاعى زاڭناماعا ساي جۇرگىزىلىپ جاتىر، ءار كۇدىكتىنىڭ ادۆوكاتپەن بايلانىسى شەكتەلمەگەن"، - دەلىنگەن اگەنتتىك حابارلاماسىندا.