قازاق مەملەكەتتىك سيركى سانكت-پەتەربۋرگ پەن ماسكەۋدە وتكەن بەدەلدى حالىقارالىق سيرك فەستيۆالدەرىندە قوس بىردەي جۇلدەگە يە بولىپ، الەمدىك ارەنادا ەلىمىزدىڭ اتىن ابىرويمەن قورعادى.
2025 جىلعى 11–14 قىركۇيەك ارالىعىندا سانكت-پەتەربۋرگتەگى ايگىلى چينيزەللي سيرك ارەناسىندا وتكەن «بەز گرانيس» IV حالىقارالىق سيرك ونەرى فەستيۆالىنە 20 ەلدەن 170-تەن استام ءارتىس قاتىستى.
⠀
قازاقستان اتىنان فەستيۆالگە قاتىسقان قازاق مەملەكەتتىك سيركىنىڭ «حاسساك» توبى (جەتەكشىسى — ادلەت تيكانوۆ) ءوز ونەرىمەن كورەرمەن مەن حالىقارالىق قازىلار القاسىن ءتانتى ەتتى.
ولاردىڭ قويىلىمى - 180 كگ تارتاتىن ءۇش ادامدى ماڭدايىمەن كوتەرىپ، كوپىرلى باسپالداقپەن الىپ وتەتىن ەكۆيليبر تريۋگى - كورەرمەن مەن قازىلار القاسىن تاڭعالدىرعان ناعىز سەنساسياعا اينالدى. بۇل تريۋكتىڭ دۇنيەجۇزىندە بالاماسى جوق جانە ول Almaty Circus Festival-دە رەسمي رەكورد رەتىندە تىركەلگەن.
فەستيۆال قورىتىندىسىندا «حاسساك» توبى التىن جۇلدەنى جەڭىپ الدى.
سونىمەن قاتار، قازاقستان سيركى ءۇشىن تاعى ءبىر مارتەبەلى وقيعا - قازاق مەملەكەتتىك سيركىنىڭ ديرەكتورى ماقسات ماراتبەك ۇلى اتالمىش فەستيۆالدە حالىقارالىق قازىلار القاسىنىڭ مۇشەسى رەتىندە شاقىرىلىپ، ەلىمىزدىڭ سيرك ونەرىنىڭ كاسىبي وكىلى رەتىندە باعالاندى.
سول كۇندەرى ماسكەۋدە، سۆەتنوي بۋلۆارداعى نيكۋلين اتىنداعى سيركتە، تاعى ءبىر ماڭىزدى شارا — «ارتيست» III حالىقارالىق سيرك فەستيۆالى ءوتتى. وعان الەمنىڭ 18 ەلىنەن ۇزدىك ونەرپازدار قاتىستى.
قازاقستان اتىنان الماتى سيركىنىڭ ءارتىسى تايسيا دەميدوۆا ونەر كورسەتتى. ونىڭ ەسىمى الەمدىك ساحنالاردا كەڭىنەن تانىمال. تايسيانىڭ جەتىستىكتەرىنىڭ قاتارىندا - مونتە-كارلوداعى حالىقارالىق فەستيۆالدىڭ التىن مەدالى، «يدول» فەستيۆالىنىڭ گران-پريى جانە باسقا دا بەدەلدى ماراپاتتار بار.
⠀
ماسكەۋدە وتكەن فەستيۆالدە تايسيا تاعى دا جوعارى كاسىبي دەڭگەيىن دالەلدەپ، قولا جۇلدەگە يە بولدى. بۇل جەڭىس - ونىڭ وتاندىق سيرك ونەرىندەگى بيىك ورنىن تاعى دا ايقىندادى.
قازاق مەملەكەتتىك سيركى - ەلىمىزدىڭ مادەني سالاسىنداعى بەتكەۇستار ۇجىمداردىڭ ءبىرى. سيرك ارتىستەرىنىڭ حالىقارالىق بايقاۋلارداعى تابىسى - قازاقستان سيرك ونەرىنىڭ جوعارى دەڭگەيدە دامىپ كەلە جاتقانىن، ءارى قازاقستاندىق سيرك مەكتەبىنىڭ الەم ساحناسىندا لايىقتى ورىن الاتىنىن دالەلدەيدى.