بلوگەر ەربولات ءجانابىلوۆ پەن ونىڭ جارى ەلميرا تولەگەنوۆاعا قاتىستى ءىس استاناداعى ەكونوميكالىق تەرگەپ-تەكسەرۋ دەپارتامەنتىنە جولداندى. سوت ولاردىڭ ارەكەتتەرىنەن قىلمىستىق قۇقىقبۇزۋشىلىق بەلگىلەرىن انىقتادى، دەپ حابارلايدى اqshamnews.kz ءتىلشىسى Tengrinews.kz-كە سىلتەمە جاساپ.
استانا قالاسىنىڭ مامانداندىرىلعان اكىمشىلىك قۇقىقبۇزۋشىلىقتار جونىندەگى اۋدانارالىق سوتىندا بلوگەرلەرگە قاتىستى ءىس قارالعان بولاتىن. بۇگىن سوت اكىمشىلىك ءىس جۇرگىزۋدى توقتاتۋ جانە ماتەريالداردى قىلمىستىق ءىس رەتىندە تەرگەۋگە بەرۋ تۋرالى قاۋلى شىعاردى.
"جەكە كاسىپكەر “ەلەر” اتىنان ءجانابىلوۆ ەربولات نۇرلىبەكۇلىنا قاتىستى ءىستىڭ ماتەريالدارى استانا قالاسى بويىنشا ەكونوميكالىق تەرگەپ-تەكسەرۋ دەپارتامەنتىنە جولدانادى"، - دەپ جاريالادى سۋديا اقەركە بەكتۇرعانوۆا.
ءدال وسىنداي شەشىم بلوگەردىڭ جۇبايى، ەلميرا تولەگەنوۆاعا قاتىستى دا قابىلداندى. ونىڭ ءىسى قارجىلىق مونيتورينگ اگەنتتىگىنىڭ ەكونوميكالىق تەرگەپ-تەكسەرۋ دەپارتامەنتىنە جىبەرىلدى.
نە جاعداي بولدى؟
بۇگىن بلوگەر ەربولات ءجانابىلوۆتىڭ جۇبايى ەلميرا تولەگەنوۆاعا قاتىستى سوت وتىرىسى ءوتتى. ول ليسەنزياسى جوق تۇلعا رەتىندە زاڭسىز لوتەرەيا ۇيىمداستىردى دەگەن ايىپپەن اكىمشىلىك جاۋاپكەرشىلىككە تارتىلعان.
سوتتا قۇمار ويىندار مەن لوتەرەيانى رەتتەۋ كوميتەتىنىڭ وكىلدەرى بلوگەرلەردىڭ ۇيىمداستىرعان ۇتىستارىن "جاي عانا بۇركەمەلەنگەن لوتەرەيا" دەپ اتادى. كوميتەت وكىلى ءابدال بالتاتەگى ءىستى اكىمشىلىك ەمەس، قىلمىستىق ءىس رەتىندە قايتا سارالاۋدى ۇسىندى.
ولار كىمدەر؟
ەربولات ءجانابىلوۆ پەن ەلميرا تولەگەنوۆا - قازاقستانداعى ەڭ تانىمال بلوگەرلەردىڭ ءبىرى. ەربولاتتىڭ Instagram پاراقشاسىندا 8،4 ميلليون، ال ەلميرانىڭ پاراقشاسىنا 7،1 ميلليون ادام جازىلعان. ولاردىڭ جازبالارى ۇنەمى ميلليونداعان قارالىم جيناپ، ۇيىمداستىراتىن ۇتىس ويىندارى ءجيى ۆيرۋستىق سيپاتقا يە بولادى.