مينيسترلىكتىڭ جوبالاۋى بويىنشا 135 مىڭ بالا گرانقا قۇجات تاپسىرۋى مۇمكىن، دەپ حابارلايدى Almaty-akshamy.kz.
عىلىم جانە جوعارى ءبىلىم مينيسترلىگىنىڭ جوعارى جانە جوعارى وقۋ ورنىنان كەيىنگى ءبىلىم كوميتەتى ءتوراعاسىنىڭ ورىنباسارى نۇربەك ساپارقوجايەۆ قازاقپارات ءتىلشىسىنىڭ ساۋالىنا جاۋاپ بەرە وتىرىپ، بيىل قانشا بالا گرانقا قۇجات تاپسىرۋى مۇمكىن ەكەنىن مالىمدەدى.
«مينيسترلىكتىڭ جوبالاۋى بويىنشا 135 مىڭ بالا گرانقا قۇجات تاپسىرۋى مۇمكىن. ويتكەنى، بيىل وسىنشاما تالاپكەر شەكتى بالل جينادى. ول وسى ازاماتتاردىڭ گرانتتىق كونكۋرسقا قاتىسۋعا مۇمكىندىگى بار دەگەندى بىلدىرەدى. ءبىلىم بەرۋ باعدارلاماسى بويىنشا، گرانتقا ءوتىنىش بەرۋگە بولاتىن بالى بار، ءبىز سوعان ساي قارايمىز. دەگەنمەن ءار بالانىڭ جوسپارى ءار ءتۇرلى. ءبىرى قۇجات تاپسىرادى، ەندى ءبىرى تاپسىرماۋى مۇمكىن. جالپى، بۇگىندە 135 مىڭ تالاپكەر مۇمكىندىگى بار» - دەپ ءمالىم ەتتى نۇربەك ساپارقوجايەۆ ءتىلشى ساۋالىنا جاۋاپ بەرە وتىرىپ.
بيىل قازاقستان بويىنشا 88 مىڭ ءبىلىم گرانتى ءبولىندى. ونىڭ ىشىندە 73 061 گرانت باكالاۆريات بويىنشا ءبىلىم الاتىن تالاپكەرلەرگە بەرىلەدى.
ايتا كەتەيىك، ەرتەڭنەن باستاپ ەgov.kz پورتالى ارقىلى گرانتقا قۇجات قابىلداۋ باستالادى. نۇربەك ساپارقوجايەۆتىڭ ايتۋىنشا، گرانت ءوتىنىش بەرۋ 13-20 شىلدە ارالىعىندا جۇرەدى.