ق ر اۋىل شارۋاشىلىعى ءمينيسترى ەربول قاراشوكەيەۆ شەگىرتكە شابۋىلى جونىندەگى ءتۇرلى ۆيدەولارعا پىكىر ءبىلدىردى، دەپ حابارلايدى Almaty-akshamy.kz.
قازاقپارات مالىمەتىنە سۇيەنسەك، وتكەن اپتا سوڭىندا مينيستر قوستاناي وبلىسىنا بارىپ، ەگىن القاپتارىن ارالاعان. سونداي-اق، وڭىرلەردە اكىمدىك جانىنان جەدەل شتابتار قۇرىلعان.
«قوستانايدا شامامەن 20 مىڭ گەكتاردا يتاليالىق پرۋس شەگىرتكەسىنىڭ ۇشۋى بايقالدى. ول جاققا دەر كەزىندە تەحنيكالار جەتكىزىلدى. قوسىمشا 40 مىڭ گەكتار جەر قوسىمشا دارىلەنىپ، ماماندار جۇمىلدىرىلدى. شەگىرتكەدەن ەش شىعىن جوق. مەسسەندجەرلەردە ءتۇرلى ۆيدەولار شىعىپ جاتىر، ال نەگىزىندە شىعىن بولعان جوق»، - دەدى ە. قاراشوكەيەۆ ۇكىمەت كۋلۋارىندا.
سونىمەن بىرگە، مينيستر شەگىرتكە تۋرالى ۆيدەو تۇسىرگەن فەرمەرلەرگە ۇندەۋ جاسادى.
«شەگىرتكە تۋرالى ۆيدەو تۇسىرسەڭىزدەر، ەگىنگە شىعىن كەلتىردى دەسەڭىزدەر، مارحابات، ءبىز جىلدام جاۋاپ بەرەمىز. ءبىزدىڭ ءموبيلدى توپتارىمىز بىردەن كەلىپ، ماسەلەنىڭ ءمان-جايىن تەكسەرەدى. كەشە دە قوستانايدىڭ ناۋرىزىم اۋدانىندا شارۋا قوجالىقتارى 3-5 مىڭ گەكتار ەگىنگە زاقىم كەلدى دەگەن ەدى، ەندى ماماندارىمىز بارايىن دەسە، قوجايىندارى قاشىپ ءجۇر، جەرىن كورسەتكىسى كەلمەيدى»، - دەدى اۋىل شارۋاشىلىعى ءمينيسترى ەربول قاراشوكەيەۆ ۇكىمەتتە.