جاڭا وقۋ جىلىندا قارۋلى كۇشتەردىڭ اۋە قورعانىسى كۇشتەرىنىڭ اۆياسيالىق بولىمدەرى وقۋ-جاتتىعۋ ۇشۋلارىن ورىنداۋعا كىرىستى، - دەپ حابارلايدى Aqshamnews.kz.
قورعانىس مينيسترلىگىنىڭ مالىمەتىنشە، 2025 جىلى ەكيپاجداردىڭ جالپى ۇشۋ ۋاقىتى 12 مىڭ ساعاتتان استى جانە بۇل كورسەتكىش جىل سايىن ارتىپ كەلەدى.
وقۋ ءىس-شارالارى ۇشۋ ەكيپاجدارىنىڭ، ينجەنەرلىك-تەحنيكالىق قۇرامنىڭ جانە قامتاماسىز ەتۋ بولىمشەلەرىنىڭ كاسىبي دەڭگەيىن ارتتىرۋعا باعىتتالعان. باعدارلاماعا ترەناجەرلاردا ساباقتار وتكىزۋ، قاۋىپسىزدىك تالاپتارىنىڭ ساقتالۋىن تەكسەرۋ، شتاتتان تىس جاعدايلاردا ارەكەت ەتۋ داعدىلارىن پىسىقتاۋ، ۇشۋ قۇرامىنىڭ، ۇشۋدى باسقارۋ توپتارىنىڭ جانە اۆياسيالىق تەحنيكانىڭ دايىندىعىن باقىلاۋ كىرەدى. ۇشۋلار بارىسىندا ەكيپاجدار اۋە شايقاسىن جۇرگىزۋدىڭ زاماناۋي تاسىلدەرىن مەڭگەرىپ، جەرۇستى جانە تەڭىز نىساندارىنا اۆياسيالىق سوققىلار جاساۋدى پىسىقتايدى. اسىرەسە اۋە بارلاۋىن جۇرگىزۋ جانە راديوەلەكتروندىق كۇرەس قۇرالدارىن قولدانۋ ماسەلەلەرىنە ەرەكشە نازار اۋدارىلادى.
«بۇل جوعارى جاۋىنگەرلىك دايىندىق دەڭگەيىن ساقتاۋعا جانە جاڭا تاكتيكالىق تاسىلدەردى كۇندەلىكتى تاجىريبەگە ۋاقتىلى ەنگىزۋگە مۇمكىندىك بەرەدى»، – دەپ اتاپ ءوتتى 19132 اسكەري ءبولىمىنىڭ شتاب باستىعى پودپولكوۆنيك تيمۋر ساندىبايەۆ.
ۇشۋ ەكيپاجدارى جابدىقتالعان جانە جابدىقتالماعان الاڭدارعا دەسانتتى تاسىمالداۋ جانە ءتۇسىرۋ، شارتتى تۇردە جارالانعانداردى ەۆاكۋاسيالاۋ، ىزدەستىرۋ-قۇتقارۋدى قامتاماسىز ەتۋ، ءتۇرلى جۇكتەردى، سونىڭ ىشىندە سىرتقى اسپاعا بەكىتىلگەن جۇكتەردى تاسىمالداۋ مىندەتتەرىن دە ورىندايدى. ۇشۋ تاپسىرمالارىنىڭ ورىندالۋ ساپاسىن وبەكتيۆتى باقىلاۋ ماتەريالدارى نەگىزىندە نۇسقاۋشىلار قاداعالايدى. ۇشۋلار كورىنۋ شەكتەۋلى، جاۋىن-شاشىندى، اۋا تەمپەراتۋراسى كۇرت وزگەرەتىن كۇردەلى مەتەورولوگيالىق جاعدايلاردا وتەدى.
تاۋلى ايماقتا ۇشۋلار قۇبىلمالى جەل اعىندارى مەن اتموسفەرالىق قىسىمنىڭ وزگەرۋىنە بايلانىستى قيىندايدى، ال سۋ ۇستىندە ۆيزۋالدى باعدارلاردىڭ بولماۋى اسەر ەتەدى. تۇنگى ۋاقىتتا ۇشقىشتار تۇنگى كورۋ قۇرالدارىن قولدانادى، ال جاسىرىن ارەكەت ەلەمەنتتەرىن پىسىقتاۋ كەزىندە بورتتىق جارىق شامدارى وشىرىلگەن كۇيدە ۇشادى. اۋە قورعانىسى كۇشتەرىندە اۆياسيالىق بولىمدەردىڭ جاۋىنگەرلىك دايارلىعىنا بولىنەتىن ۋاقىتتىڭ جىل سايىن تۇراقتى تۇردە ارتىپ كەلە جاتقانى اتاپ وتىلەدى.