ۇكىمەتتە حيميا جانە مەتاللۋرگيا سالالارىنداعى ءىرى ونەركاسىپ جوبالارىنىڭ جۇزەگە اسىرىلۋ بارىسى قارالدى
پرەمەر-مينيستر ولجاس بەكتەنوۆ حيميا جانە مەتاللۋرگيا سالالارىندا جوعارى دەڭگەيدە وڭدەلگەن ءونىم شىعاراتىن كلاستەر قۇرۋعا باعىتتالعان ءىرى ونەركاسىپ جوبالارىن جۇزەگە اسىرۋ ماسەلەلەرى بويىنشا كەڭەس وتكىزدى. مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس، ەكسپورتقا باعدارلانعان ءوندىرىستى قالىپتاستىرۋ جۇمىستارى جۇرگىزىلۋدە.
ونەركاسىپ جانە قۇرىلىس ءمينيسترى ەرسايىن ناعاسپايەۆ بۇگىندە جالپى ينۆەستيسيا كولەمى شامامەن $10 ملرد جانە 8،7 مىڭنان استام تۇراقتى جۇمىس ورنىن اشاتىن 5 ءىرى باستامانىڭ جۇزەگە اسىرىلىپ جاتقانىن باياندادى.
اباي وبلىسىندا قۋاتتىلىعى 300 مىڭ توننا كاتودتى مىس بالقىتۋ زاۋىتىنىڭ قۇرىلىسى جۇرگىزىلۋدە. ينۆەستيسيانىڭ جالپى كولەمى $1،5 ملرد-قا جەتەدى. زاۋىت جۇمىس ىستەپ تۇرعان بوزشاكول، اقتوعاي جانە شىعىستۇستىمەت كەن ورىندارىنان كونسەنتراتتاردى وڭدەۋگە ارنالعان. 1 مىڭنان استام تۇراقتى جۇمىس ورنىن اشۋ كوزدەلگەن. بۇگىنگى تاڭدا جوبا ءبىرىڭعاي يندۋستريالاندىرۋ كارتاسىنا ەنگىزىلىپ، ينفراقۇرىلىمعا قوسىلۋ بويىنشا ءىس-شارالار جۇرگىزىلۋدە.
قاراعاندى وبلىسىندا «Qarmet» اق ءوندىرىس كولەمىن ارتتىرا وتىرىپ ماشينا جانە اۆتوموبيل جاساۋ كاسىپورىندارى ءۇشىن ءونىمنىڭ جاڭا تۇرلەرىن شىعارۋ ارقىلى اۋقىمدى جاڭعىرتۋ باعدارلاماسىن ىسكە اسىرۋدا. ينۆەستيسيا كولەمى $3،5 ملرد-تى قۇرايدى. 2028 جىلعا دەيىن جىل سايىن 9 ملن تونناعا دەيىن كومىر ءوندىرۋدى، 5 ملن تونناعا دەيىن تەمىر كەنى كونسەنتراتى مەن بولات ءوندىرۋدى قامتاماسىز ەتۋ جوسپارلانۋدا. 2 مىڭ جاڭا جۇمىس ورنى اشىلادى. بۇعان دەيىن جۇرگىزىلگەن جۇمىستاردىڭ ناتيجەسىندە 2024 جىلى وندىرىستىك قىزمەت تولىق قالپىنا كەلتىرىلدى، جابدىقتاردى كۇردەلى جوندەۋ اياقتالدى، 8 شاحتانىڭ 7-ەۋىندە كومىر ءوندىرۋ جۇمىستارى جۇرگىزىلۋدە، بۇل ءوندىرۋ كولەمىن 7%-عا ارتتىرۋعا مۇمكىندىك بەردى.
قوستاناي وبلىسىندا «سسكوب» اق بازاسىندا قۋاتى جىلىنا 2 ملن توننا، قۇرامىندا 90%-دان استام تەمىر بار ىستىق بريكەتتەلگەن تەمىر وندىرەتىن زاۋىت سالۋ جوسپارلانۋدا. كاسىپورىن مەتاللۋرگيادا ەكولوگيالىق تازا تەحنولوگيالاردى ەنگىزۋ ءۇشىن تىرەك نىسانىنا اينالادى. بۇگىنگى تاڭدا حالىقارالىق قارجى ينستيتۋتتارىنىڭ قاتىسۋىمەن گاز جەتكىزۋ، ينفراقۇرىلىمعا قوسىلۋ جانە قارجىلاندىرۋ كوزدەرى ماسەلەلەرى پىسىقتالۋدا. ينۆەستيسيالاردىڭ جالپى كولەمى $1،2 ملرد-تى قۇرايدى. جوبانى جۇزەگە اسىرۋ ناتيجەسىندە 1 مىڭ تۇراقتى جۇمىس ورنى اشىلادى.
باتىس قازاقستان وبلىسىندا «ساتيمولا» كەن ورنى بازاسىندا كاليي ءحلوريدىن شىعارۋ بويىنشا بايىتۋ-وندىرىستىك كەشەن سالۋ جوباسى ىسكە اسىرىلۋدا. كاسىپورىن قۋاتىن جىلىنا كاليي ءحلوريدىن 12 ملن تونناعا دەيىن بىرتىندەپ ارتتىرا وتىرىپ، ءتورت كەزەڭ بويىنشا ىسكە قوسىلادى دەپ جوسپارلانۋدا. قازىرگى ۋاقىتتا جوبادا بۇرعىلاۋ جۇمىستارى جۇرگىزىلۋدە، جەر تەلىمدەرى الىندى، تاۋ جىنىستارىن مۇزداتۋ ۇدەرىستەرى ىسكە قوسىلدى، سىرتقى ينفراقۇرىلىم قالىپتاسۋدا. جوبانىڭ جالپى قۇنى $2،4 ملرد-تان اسادى.
سونداي-اق پرەمەر-مينيسترگە ماڭعىستاۋ وبلىسىنداعى «KazAzot Prime» ج ش س اممياك-كارباميد كەشەنىنىڭ قۇرىلىسى تۋرالى باياندالدى. جوبا ىشكى نارىقتىڭ مينەرالدى تىڭايتقىشتارعا دەگەن سۇرانىسىن قامتاماسىز ەتەدى. ىسكە اسىرۋ ناتيجەسىندە 700 جۇمىس ورنى اشىلادى. ىسكە قوسۋ 2029 جىلى كۇتىلۋدە. ينۆەستيسيا كولەمى شامامەن $1،5 ملرد.