پرەمەر-مينيستر ولجاس بەكتەنوۆ پەن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ اتىنا ساۋال جولداعان دەپۋتاتتار بالالاردى قورعاۋ كۇنىن مەملەكەتتىك مەرەكە رەتىندە بەكىتۋدى ۇسىنعان، دەپ حابارلايدى aqshamnews.kz
قازاقستاندا 1 ماۋسىم - «بالالاردى قورعاۋ كۇنى» مەملەكەتتىك مەرەكە رەتىندە بەلگىلەنۋى مۇمكىن. بۇل تۋرالى ءبىر توپ دەپۋتاتتىڭ دەپۋتاتتىق ساۋالىنا جاۋاپ بەرگەن ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ جاۋابىندا ايتىلعان.
«بۇل مەرەكە جىل سايىن 1 ماۋسىمدا وتەدى، ول ەندىگى مەملەكەتتىك مارتەبەگە لايىق دەپ سانايمىز»، - دەپ جازعان ەدى دەپۋتاتتار ءوز ساۋالىندا.
وزگە دە مەرەكە كۇندەرىن اۋىستىرۋعا قاتىستى قازىرگى ەرەجەلەردى بايانداعان مينيسترلىك دەپۋتاتتاردىڭ پوزيسياسىن قولداپ، مىنانداي جاۋاپ قايتارعان.
«ءداستۇر بويىنشا، بۇل كۇنى اتا-انالار بالالاردى اتتراكسيوندار ساياباعىنا، ويىن ورتالىقتارىنا سەرۋەندەۋگە اپارادى جانە جالپى مەرەكەلىك كوڭىل-كۇيدى ۇيىمداستىرادى. اتالعان مەرەكە اتا-انالار مەن بالالارعا بىرلەسىپ ۋاقىت وتكىزۋگە، مادەني، تاربيەلىك جانە قوعامدىق ءىس-شارالارعا قاتىسۋعا مۇمكىندىك بەرەدى. بۇل بالانىڭ جاقسى پسيحوەموسيونالدى جاعدايدا وتباسىنىڭ جانىندا تولىق قاۋىپسىزدىكتى سەزىنۋىنە اسەرىن تيگىزەدى. جوعارىدا ايتىلعانداردىڭ نەگىزىندە، سونىمەن قاتار ەلىمىزدە وتباسى ينستيتۋتى مەن وتباسىلىق قۇندىلىقتاردى نىعايتۋ ماقساتىندا «بالالاردى قورعاۋ كۇنىن» 1 ماۋسىم كۇنى مەملەكەتتىك مەرەكە رەتىندە بەلگىلەۋدى مۇمكىن دەپ سانايمىز»، - دەپ جازىلعان جاقىپوۆانىڭ جاۋابىندا.