ۇلتتىق بانك ازاماتتاردى ساق بولۋعا شاقىردى، سەبەبى الاياقتار جالعان قۇجاتتار مەن رەكۆيزيتتەردى، سونداي-اق، جالعان ءموبيلدى قوسىمشالار مەن الەۋمەتتىك جەلىدەگى پاراقشالاردى پايدالانىپ، الداۋى مۇمكىن، دەپ حابارلايدى aqshamnews.kz
"الاياقتاردىڭ كوزدەيتىنى - ازاماتتاردىڭ جەكە شوتىنا، دەپوزيتىنە، اقشا اۋدارىمدارىنا قول جەتكىزۋ جانە اتىنا ونلاين نەسيە نەمەسە ميكروكرەديت راسىمدەۋ"، - دەپ ەسكەرتتى ۇلتتىق بانك وكىلدەرى.
ولار ءوزىن ۇلتتىق بانكتىڭ، مەملەكەتتىك نەمەسە قۇقىق قورعاۋ ورگاندارىنىڭ، ەكىنشى دەڭگەيلى بانكتەردىڭ، ۇيالى بايلانىس وپەراتورىنىڭ نەمەسە كوممۋنالدىق قىزمەتتىڭ قىزمەتكەرىمىز دەپ تانىستىرۋى مۇمكىن. سونداي-اق، ازاماتتارعا ءتۇرلى سىلتاۋمەن حابارلاسىپ، جالعان قۇجاتتار مەن بانككە اقشا اۋدارۋعا ارنالعان رەكۆيزيتتەر جىبەرۋى دە ىقتيمال.
"الاياقتار سىزگە كەلگەن SMS حابارلامانى، راستاۋ كودىن جىبەرۋدى، كۇماندى سىلتەمەلەرگە كىرىپ، ءتۇرلى قوسىمشالاردى جۇكتەپ الۋدى نەمەسە مەسسەندجەردەگى جاڭا فۋنكسيالاردى ىسكە قوسۋدى سۇرايدى. ونىڭ ءبارى - تەلەفونىڭىزداعى بارلىق اقپاراتقا قول جەتكىزۋ ءۇشىن جاسالاتىن قۋلىق. ۇلتتىق بانك ازاماتتاردى بارىنشا ساق بولۋعا شاقىرادى. كەز كەلگەن قوڭىراۋ، حات، حابارلاما نەمەسە سۇراۋ سالعان كەزدە ونىڭ راس-وتىرىگىن مىندەتتى تۇردە تەكسەرىپ العان ءجون. كۇماندى سىلتەمەلەرگە وتپەڭىز، ءوزىڭىز بىلمەيتىن قوسىمشالاردى تەلەفونعا جۇكتەمەڭىز جانە بەيتانىس ادامداردىڭ شوتىنا اقشا اۋدارماڭىز"، - دەپ جازىلعان حابارلامادا.
ۇلتتىق بانك مالىمەتىنشە، بانك قىزمەتكەرلەرى جەكە تۇلعالارعا ەشقاشان اۋديو جانە ۆيدەوقوڭىراۋ شالمايدى، جەكە شوتتارىن جۇرگىزبەيدى، قانداي دا ءبىر ينۆەستيسيالىق قورلارعا نەمەسە قارجى ونىمدەرىنە ينۆەستيسيا سالۋعا شاقىرمايدى، قاراجاتتى ساقتاندىرمايدى جانە حالىقپەن اقشالاي ەسەپ ايىرىسپايدى.
"الاياقتارعا تاپ بولساڭىز، دەرەۋ قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنىپ، ارىز جازۋعا كەڭەس بەرەمىز. قوسىمشا كەڭەس الۋ ءۇشىن 1477 قىسقا ءنومىرى ارقىلى ۇلتتىق بانكتىڭ بايلانىس ورتالىعىنا حابارلاسا الاسىز"، - دەپ جازىلعان حابارلامادا.