Qujat balalardyń emosıalyq, kognıtıvtik jáne minez-qulqyndaǵy saldarlardy eńserýge baǵyttalǵan.
Balalar men olardyń ata-anasyna psıhologıalyq kómek kórsetý boıynsha ádistemelik usynymdar ázirlendi, dep habarlaıdy Almaty-akshamy.kz
Oqý-aǵartý mınıstrliginiń málimetinshe, baǵdarlamanyń maqsaty – zorlyq-zombylyqqa, qatygezdikke, býllıngke ushyraǵan, sondaı-aq qylmysqa kýá bolǵan balalarǵa keshendi kómek kórsetý.
Atalmysh bastama balalarǵa kómek kórsetý algorıtmin jáne kámeletke tolmaǵan balalardyń qajettilikterin baǵalaý negizinde medısınalyq, psıhologıalyq, pedagogıkalyq, áleýmettik jáne quqyqtyq kómek kórsetý túrleriniń keshenin qamtıdy. Sondaı-aq baǵdarlama sheńberinde balalar men olardyń ata-analaryna psıhologıalyq kómek kórsetý boıynsha biryńǵaı ádistemelik usynymdar ázirlendi.
«Árbir bala zorlyq-zombylyqtan qorǵalýǵa tıis. Osy bastamanyń qabyldanýy – memleket pen qoǵamnyń bala quqyǵyn qorǵaý jáne árbir balanyń qaýipsiz balalyq shaǵyn qamtamasyz etýdegi mindettemesiniń kórinisi. Bul baǵdarlama – balalarǵa zardap saldarymen kúresý jáne psıhologıalyq turǵyda qoldaý júıesin qurýdaǵy mańyzdy qadam», - dedi Balalardyń quqyǵyn qorǵaý komıteti tóraǵasynyń orynbasary Iýlıa Ovechkına.
Kómek kórsetý oblystyq deńgeıde psıhologıalyq qoldaý ortalyqtarynyń, aýdandyq deńgeıde bilim bólimderiniń bazasynda iske asyrylady.