Abaı men Qurmanǵazynyń, Jambyl men Nurǵısa Tilendıevtiń dombyralary túrkıalyqtarǵa tanystyryldy.
Ystambul qalasynda Almaty mýzeıler birlestiginiń «Dala daýysy» halyqaralyq kórmesi ótti. Bas konsýldyqtyń qoldaýymen uıymdastyrylǵan shara Táýelsizdik kúni men Qazaqstan-Túrkıa dıplomatıalyq qarym-qatynasynyń 30 jyldyǵyna oraılastyrylǵan, dep habarlaıdy Almaty-akshamy.kz 24.kz-ke silteme jasap.
Kórmede qala turǵyndarynyń nazaryna Yqylas atyndaǵy mýzykalyq aspaptar mýzeıiniń qoryndaǵy qundy jádigerler usynyldy. Olardyń qatarynda belgili tulǵalar qoldanǵan aspaptardyń dálme-dál kóshirmeleri de bar. Sharaǵa kelgen túrkıalyqtar qazaqtyń kóne mýzykalyq aspaptaryn asqan qyzyǵýshylyqpen tamashalady.
«Kórmeniń negizgi maqsaty - túbi bir túrki halyqtarynyń mýzykalyq mádenıetin tanytý, nasıhattaý. Túrkıa jurtshylyǵy bizdiń Ystambul qalasynda uıymdastyryp otyrǵan kórmemizge óte qyzyǵýshylyq tanytyp otyr. Ulttyq aspaptar bul Yqylas atyndaǵy mýzykalyq aspaptar mýzeıiniń qorynda saqtalǵan biregeı aspaptar», - dedi Almaty qalasy mýzeıler birlestiginiń dırektory Lázzat Saǵyndyqova.
«Búgingi kórme tamasha ótti. Bizdiń mádenıetimiz bir, tarıhymyz bir. Sondyqtan dál osyndaı kórmeniń bizdiń aýdanda ótkizilip otyrǵanyna óte qýanyshtymyn. Bir baıqaǵanym - ulttyq mýzyka aspaptarymyz uqsas eken. Bul da - baýyrlastyqtyń bir belgisi», - dedi Ystambul qalasy Baqyrkóı aýdandyq teatr departamentiniń dırektory Asýman Aıdoǵmýsh.