Óskemendegí Altay Pro klubynda jaqynda erekshe sát boldy. 5 jasar bala álem chempıonymen teń dárejede dop almasyp, barshany tańǵaldyratynyn kím oılaǵan? Būl - ústel tennısínen kíshkentaı maıtalman atanǵan Maksımníń oqıǵasy.
Vıdeo áleumettík jelíde tarap kettí. Onda kíshkentaı darynnyń álem chempıony Verner Shlagerge des bermegenín baıqauǵa bolady. Aqshamnews.kz tílshísí balanyń anasy Yulıyamen sūhbattasty.
Álem chempıony Verner Shlager (sol jaq shette) men Europa chempıony Vladımır Samsonovpen (oń jaq shette) túsken suret
Tuǵanynan tennıs zalynda ósken bala
Maksım - tennıs zalynda "tuǵan" bala. Sebebí onyń ata-anasy – kásíbı sportshylar, ústel tennısíníń naǵyz maıtalmandary. Ákesí - Reseıdíń, anasy - Qazaqstannyń sport sheberí. Kíshkentaı Maksım ata-anasymen bírge únemí jattyǵu zalynda júredí.
“Ony bír jasynda ústelge otyrǵyzyp, kíshkentaı raketka beretínbíz. Sol kezde-aq dopty qaıtaruǵa tyrysatyn", - deıdí anasy.
Búgínde Yulıya da, onyń joldasy da Altay Pro klubynyń jattyqtyrushylary. Anasy būryn Qazaqstan qūramasynda oınap, 2017 jyly sporttyq mansabyn ayaqtap, bapkerlíkke auysqan.
Balanyń ata-anasy ony sport jolyna salǵysy kelmegen
Ekí kásíbı sportshy úshín balanyń da sol jolmen júruí – bír jaǵynan maqtanysh, ekínshí jaǵynan jauapkershílík.
“Shynyn aıtsaq, Maksımdí míndettí túrde tennıske beremíz dep oılamadyq. Bapker emes, ata-ana bolǵymyz keldí. Bíraq onyń darynyn kórgen soń, jolyna kedergí boluǵa bolmaıtynyn túsíndík.”
Maksımníń tehnıkasy jasyna qaramastan erekshe: ol jyldam reaktsıyasymen, dáldígímen jáne oıyn kezíndegí ūstamdylyǵymen erekshelenedí.
Maksım tennıspen ǵana shektelmeıdí
Maksım mektepke álí bara qoıǵan joq. Qazír ol kún saıyn jattyǵady, oǵan qosa, aǵylshyn tílín úırenudí bastady.
Ústel tennısínen bólek, badmıntondy da jaqsy kóredí. Ata-anasynyń jūmys zalynda badmınton alańy da bar. Al futbolda qaqpashy boluǵa qūmar.
“Eseıgende bolǵanda kím bolasyń?” degen sūraqqa onyń jauaby daıyn. “Chempıon!”
Balanyń armany – Qazaqstan Prezıdentímen oınau
Maksımníń bír erekshe armany – Qazaqstan Prezıdentí Qasym-Jomart Toqaevpen ústel tennısín oınau.
Būl armannyń tarıhy da bar. Maksımníń anasy Yulıya 2017 jyly Qazaqstan Respublıkasynyń chempıonatynda óner kórsetkende, oǵan marapatty sol kezde ústel tennısí federatsıyasyn basqarǵan Qasym-Jomart Toqaev tabystaǵan.
Al endí, araǵa jyldar salyp, onyń ūly Memleket basshysymen oınaudy arman etken. Būl - kez kelgen sportshy bala úshín úlken motıvatsıya, al otbasy úshín erekshe sát bolar edí.