Ushaq bortynda temeki shekkeni úshin 2 qyzǵa aıyppul salynyp, olar reısten túsirildi, dep habarlaıdy Almaty-akshamy.kz Polisia.kz-ke silteme jasap.
«Áýe kemesiniń bortynda temeki shekkeni úshin Astana qalasynyń 20 jastaǵy turǵyny akt boıynsha «Sharm-El-SHeıh – Astana» baǵytyndaǵy áýe reısinen túsirilip, kólik polıseılerine berildi. Jas qyz QR Ákimshilik quqyq buzýshylyq týraly kodekstiń 441-baby 1-2-bóligi boıynsha ákimshilik jaýapkershilikke tartylyp, 50 aılyq eseptik kórsetkish kóleminde aıyppul salyndy (153 150 teńge)», - delingen polısıa habarlamasynda.
Málim etilgendeı, dál osyndaı quqyq buzýshylyq jasaǵany úshin taǵy bir qyz – Oral qalasynyń turǵyny «Oral – Almaty» baǵytyndaǵy áýe reısinen túsirilgen.
Jalpy bıylǵy jyl basynan elimizdiń kólik polıseıleri túrli ákimshilik quqyq buzýshylyqtar jasaǵany úshin áýe reısinen 379 azamatty túsirgen. Onyń ishinde áýe kemesiniń bortynda temeki ónimderin tutynǵany úshin – 106, alkogól ishimdikterin ishkeni nemese qoǵamdyq oryndarda mas kúıinde bolǵany úshin 204 adam jaýapqa tartyldy.