Úkimettiń 2025 jylǵy 29 qyrkúıektegi qaýlysymen tulǵalardyń sanattary boıynsha derekterdi usynýǵa jaýapty memlekettik organdardyń tizbesine ózgerister engizildi, dep habarlaıdy Aqshamnews.kz.
Atap aıtqanda, «Mindetti áleýmettik medısınalyq saqtandyrý týraly» 2015 jylǵy 16 qarashadaǵy Qazaqstan Respýblıkasynyń Zańy 26-babynyń 1-tarmaǵynda jáne 26-1-babynyń 1-tarmaǵyna atalǵan adamdardyń sanattary boıynsha jáne Eýrazıalyq ekonomıkalyq odaqqa múshe memleketterden Qazaqstan Respýblıkasynyń aýmaǵynda ýaqytsha bolatyn jáne eńbekshi kóship-qonýshylar bolyp tabylatyn sheteldikter, sondaı-aq olardyń otbasy músheleri boıynsha derekterdi mindetti áleýmettik medısınalyq saqtandyrýdyń aqparattyq júıesine odan ári berý úshin «Azamattarǵa arnalǵan úkimet» memlekettik korporasıasy» komersıalyq emes aksıonerlik qoǵamyna usynýǵa jaýapty memlekettik organdardyń tizbesin aıqyndaldy.
Tizimniń birneshe joldary jańa redaksıada kórsetilgen. Máselen, Eńbek jáne áleýmettik qorǵaý mınıstrligi kelesi sanattaǵy adamdar boıynsha derekterdi usynýǵa jaýapty:
- Sýbsıdıalanatyn jumys oryndaryna jumysqa ornalastyrylǵan nemese jumys ornynan kásiptik oqýǵa jiberilgen adamdardy qospaǵanda, jumyssyz retinde tirkelgen adamdar – «Eńbek naryǵy» AJ.
- Múgedek balany (múgedek balalardy) tárbıelep otyrǵan anaǵa nemese ákege, bala asyrap alýshyǵa, qorǵanshyǵa (qamqorshyǵa) taǵaıyndalatyn jáne tólenetin memlekettik járdemaqyny jumys istemeıtin alýshylar – «Zeınetaqy jáne járdemaqy alýshylardyń ortalyqtandyrylǵan derekter bazasy» AJ, «Tólemderdi óńdeýdi uıymdastyrý» AJ.
- Birinshi toptaǵy múgedektigi bar adamǵa kútim jasaýdy júzege asyratyn jumys istemeıtin memlekettik járdemaqy alýshylar – «Zeınetaqy jáne járdemaqy alýshylardyń ortalyqtandyrylǵan derekqory» avtomattandyrylǵan AJ, «Tólemderdi óńdeýdi uıymdastyrý» AJ.
- Zeınetaqy tólemderin alýshylar, onyń ishinde Uly Otan soǵysynyń ardagerleri – «Zeınetaqy men járdemaqy alýshylardyń ortalyqtandyrylǵan derekter bazasy» avtomattandyrylǵan AJ, «Tólemderdi óńdeýdi uıymdastyrý» AJ. Osy sanat boıynsha QR Sot ákimshiligi de jaýapty.
Sonymen qatar tizbe taǵy bir sóılemmen tolyqtyryldy:
-Sońǵy úsh aı ishinde mindetti zeınetaqy jarnalaryn tólemegen jáne áleýmettik ál -aýqattyń daǵdarystyq nemese shuǵyl deńgeılerine jatatyn jumys istemeıtin tulǵalar – «Otbasynyń sıfrlyq kartasy» taldamalyq sheshimi.
Qaýly 2026 jylǵy 1 qańtardan bastap qoldanysqa engiziledi.