Túsindirý jumystary nátıjesinde adamdar 100-den asa qarýdy erikti túrde tapsyrǵan.
QR İİM Tergeý departamentiniń bastyǵy Sanjar Ádilovtiń aıtýynsha, urlanǵan qarýdy satý faktileri anyqtaldy, dep habarlaıdy Almaty-akshamy.kz QazAqparatqa silteme jasap.
«Qylmyskerlerdiń urlanǵan qarýdy satý faktileri anyqtaldy. 18 aqpanda Jambyl oblysynyń Baızaq aýdanynda jedel is-sharalar barysynda urlanǵan Kalashnıkov avtomatyn satý barysynda Taraz qalasynyń 45 jasar turǵynyn krımınaldyq polısıa qyzmetkerleri ustady. Jeke tintý kezinde kúdiktiden qarýdy satýdan túsken 300 myń teńge, al avtomashına salonynan eki Kalashnıkov avtomaty oq-dárisimen tárkilendi», - dedi S.Ádilov Ortalyq komýnıkasıalar qyzmetinde.
Onyń aıtýynsha, túsindirý jumystary nátıjesinde adamdar 100-den asa qarýdy erikti túrde tapsyrdy.
«Qarýdy erikti túrde tapsyrǵan adam, eger onyń áreketterinde basqa qylmys quramy bolmasa, qylmystyq jaýapkershilikke tartylmaıtynyn esterińizge salamyn», - dedi S.Ádilov.