Eki myńǵa jýyq adam qatysqan.
Jarysqa salaýatty ómir saltyn ustanatyn 10 men 80 jas aralyǵyndaǵy 2 myńǵa jýyq adam qatysyp, túrli qashyqtyqtardy júgirip ótti, dep habarlaıdy Almaty-akshamy.kz Almaty.tv silteme jasap.
Sharada almatylyqtardan ózge, ádettegideı, elimizdiń túkpir-túkpirinen kelgen sportshylar da qatysty.
Jarysty júgirýdi kúndelikti daǵdyǵa aınaldyrǵan qala turǵyndary asyǵa kútkeni anyq. Olardyń arasynda túrli salada qyzmet etetin mamandardan bastap, kásibı sportshylarǵa deıin bar. Qatysýshylar 3 qashyqtyq boıynsha synǵa tústi. Balalar 3 shaqyrymǵa júgirse, ereksekter 10, skandınavıalyq júrispen aınalysatyndar 7 shaqyrymdyq básekede ózderin synap kórdi.
«Jastardy osyndaı sportpen aınalysýǵa shaqyramyn. Menen úlgi alyńyzdar. 42 shaqyrymdy 73 ret júgirgenmin. Mynadaı maýsymdyq júgirýdi múlde jibermeımin», - deıdi qatysýshy Tileýjan Qanapıanov.
Uıymdastyrýshylar elimizde karantın talaptarynyń jeńildegenine qaramastan, sportshylardyń qaýipsizdigine asa mán bergenin aıtady. Iaǵnı, qatysýshylar aldyn ala «Ashyqpen» tekserilip, keıin júgirýge múmkindik aldy. Olar sondaı-aq joldyń ýaqytsha jabylǵanyna qaramastan, túsinistik tanytqan kólik júrgizýshilerine de alǵysyn aıtty.
«Bizdiń qysqy marafonymyz osymen 8-shi ret ótip jatyr. Júgirýdi daǵdyǵa aınaldyrǵan adam únemi kóńildi, ómirge degen qushtarlyǵy artyp, densaýlyǵy jaqsara túsedi. Qazir jasóspirimderge de qatysýǵa múmkindik berip jatyrmyz. Olardy pandemıa órship turǵan kezde toqtatqan edik», - dedi uıymdastyrýshy Saltanat Qazybaeva.
Odan bólek, uıymdastyrýshylar jyl aıaǵyna deıin osyndaı on shaqty marafon ótkizýdi josparlap otyr. Kelesi shara 13 naýryzǵa belgilense, eń úlken marafon 25 qyrkúıekte ótedi.