Erevanda Parlamenttik Assambleıanyń is-sharalary ótti
Ótken jyldar ishinde UQSHU ózin tıimdi halyqaralyq uıym retinde kórsete bildi. Bul týraly Parlament Májilisiniń tóraǵasy Erlan Qoshanov Erevandaǵy Ujymdyq qaýipsizdik týraly shart uıymy Parlamenttik Assambleıasynyń is-sharalary barysynda aıtty, dep habarlaıdy Almaty-akshamy.kz QazAqparat-qa silteme jasap.
«UQSHU qyzmetiniń negizgi baǵyttarynyń biri – parlamentaralyq baılanys. Bul uıymnyń basymdyqtaryn eskere otyryp, ulttyq zańnamany júıeli túrde úılestirýge jáne parlamentaralyq yntymaqtastyqty damytýǵa múmkindik berdi», – dedi Palata tóraǵasy.
Ol uıymnyń halyqaralyq jáne óńirlik deńgeıde qaýipsizdikti qamtamasyz etýdegi bitimgershilik qyzmetiniń áleýeti joǵary ekenine nazar aýdardy. Ótken jyly mereıtoılyq Samıtte Qazaqstan Respýblıkasynyń Prezıdenti Qasym-Jomart Kemeluly Toqaev aıtqan UQSHU-ny BUU-nyń bitimgershilik qyzmetine qosý týraly usynysty júzege asyrý úshin qazir barlyq jaǵdaı jasalǵany erekshe atap ótti. Bul qadam uıymǵa BUU aıasynda beıbitshilikti qoldaýǵa baǵyttalǵan halyqaralyq operasıalarǵa qatysýǵa múmkindik beredi. Bul ásirese, Aýǵanstandaǵy kúrdeli jaǵdaıdyń jalǵasýyna baılanysty ózekti bolyp otyr. Osyny eskere otyryp, Erlan Qoshanov yqtımal qaýip-qaterlerdiń aldyn alý, sodyrlar men radıkaldy dinı aǵymdardy ustanýshylardyń UQSHU elderiniń aýmaǵyna kirýine jol bermeý úshin ońtústik shekaralarda Uıymnyń jaýapkershilik aımaǵyn kúsheıtý mańyzdy ekenin jetkizdi. Keńes otyrysynda Parlament ókilderi UQSHU Ujymdyq qaýipsizdik keńesiniń ótken jylǵy qyrkúıektegi sesıasynyń sheshimderin iske asyrý qorytyndylaryn jáne Uıymnyń sesıaaralyq kezeńdegi qyzmetin talqylady.