Kezdesýge qatysýshylar birlesken komúnıke qabyldady.
Nú-Delı qalasynda Úndistan men Ortalyq Azıa elderi ulttyq qaýipsizdik jónindegi keńesshileriniń – qaýipsizdik keńesteri hatshylarynyń alǵashqy kezdesýi ótti, dep habarlaıdy Almaty-akshamy.kz Aqordanyń resmı saıtyna silteme jasap.
Oǵan Qazaqstan Respýblıkasy Prezıdentiniń kómekshisi – Qaýipsizdik Keńesiniń Hatshysy Ǵızat Nurdáýletov qatysty.
İs-shara barysynda jıynǵa qatysýshylar qaýipsizdiktiń óńirlik jáne halyqaralyq ózekti máseleleri, sonyń ishinde terorızmge, separatızm men ekstremızmge, qarý men esirtkiniń zańsyz aınalymyna, transulttyq uıymdasqan qylmysqa qarsy is-qımyl, halyqaralyq aqparattyq qaýipsizdikti qamtamasyz etý salalaryndaǵy yntymaqtastyqty damytý jóninde jan-jaqty pikir almasty.
Taraptar Aýǵanstandaǵy qazirgi jaǵdaıdy jáne onyń óńirdegi qaýipsizdik pen turaqtylyqqa áserin, sondaı-aq «Soltústik – Ońtústik» halyqaralyq kólik dálizin (INSTC) damytý perspektıvalaryn talqylady.
Ǵızat Nurdáýletov áriptesterin halyqaralyq jáne óńirlik qaýipsizdiktiń ózekti máselelerine qatysty Qazaqstannyń ustanymy týraly habardar etip, «Ortalyq Azıa – Úndistan» dıalogy aıasynda qaýipsizdik salasyndaǵy yntymaqtastyq jóninde birqatar usynys aıtty.
Kezdesý qorytyndysy boıynsha kezdesýge qatysýshylar birlesken komúnıke qabyldady. Onda Qazaqstan Respýblıkasynyń BUU aıasynda Aýrýlar men bıologıalyq qaýipsizdikti baqylaý jónindegi óńirlik ortalyqtar jelisin qurý, sondaı-aq arnaıy kópjaqty organ – Bıologıalyq qaýipsizdik jónindegi halyqaralyq agenttik (IABS) qurý jónindegi bastamasynyń mańyzdylyǵy atap ótildi.