Búdjetti qalyptastyrý jumysy jalǵasady
Búgin Ulytaý oblystyq máslıhatynyń V sesıasy ótip, onda oblystyń 2022-2024 jyldarǵa arnalǵan búdjeti qabyldandy, dep habarlaıdy Almaty-akshamy.kz BAQ.KZ-ke silteme jasap.
Máslıhat hatshysy Baýyrjan Shyńǵysov tóraǵalyq etken sesıaǵa oblys ákimi Berik Ábdiǵalıuly, oblys ákiminiń orynbasarlary, basqarma basshylary qatysty.
Sesıa kún tártibinde Ulytaý oblysynyń 2022-2024 jyldarǵa arnalǵan búdjetin bekitý, QR Úkimetine Ulytaý oblysynyń shekaralaryn bekitý týraly usynys engizý jáne oblys ákiminiń halyqpen kezdesýiniń ıkemdi kúntizbesin bekitý syndy negizgi úsh másele qaraldy.
Alǵashqy másele boıynsha Ulytaý oblysy qarjy basqarmasy basshysynyń mindetin atqarýshy Vıktorıa Stavıskaıa baıandama jasady.
Basqarma basshysynyń habarlaǵanyndaı, oblystyń búdjeti Qaraǵandy oblysynyń búdjetinen jáne aýdan (qala) búdjetteri transfertterinen qalyptasyp otyr. Qaraǵandy oblysynyń 610 mlrd 161,3 mln teńgeni quraıtyn búdjetin bólý kezinde Ulytaý oblysy búdjeti túsimderiniń úlesi 17 paıyzdy nemese 103 mlrd 586 mln teńgeni, shyǵystardyń úlesi 15,6 paıyzǵa nemese 95 mlrd 320,3 mln teńgeni qurady. «Qazaqmys» kompanıalar Tobynyń 9 kásipornynyń oblys aýmaǵyna qaıta tirkelýine baılanysty 8 mlrd 256,6 mln teńge profısıt qalyptasqan.
«2022 jylǵa arnalǵan oblys búdjetiniń kiris bóligi qosymsha túsimdermen birge 29 mlrd 847 mln 942 myń teńgeni qurady. Aýdan, qalalardan túsetin transfertter 13 mlrd 813 mln 038 myń teńgeni qurady. Osy jylǵy búdjettiń barlyq túsimderi 43, 6 mlrd teńgege teń», – delingen habarlamada.
Osy jylǵy oblys búdjetiniń shyǵys bóligi 30, 8 mlrd teńge kóleminde josparlanyp otyr.
«Shyǵystardyń negizgi úlesi áleýmettik salaǵa (bilim berý, densaýlyq saqtaý, áleýmettik qamtamasyz etý) jumsalady», - dedi qarjy basqarmasynyń basshysy.
Aımaq basshysy Berik Ábdiǵalıuly búdjetti qalyptastyrý jumysy áli jalǵasatynyn, edi respýblıkalyq búdjetten túsetin transfertter men sýbvensıalardy anyqtaý máselesi qaralatynyn aıtty.