Almaty qalasy máslıhatynyń kezekten tys XVIII sesıasy ótti, onda depýtattar Almaty qalasy ákimdiginiń ár soǵys ardagerine 1 mln teńge kóleminde tólem bólý týraly usynysyn qoldady, dep habarlaıdy Almaty-akshamy.kz.
Esterińizge sala keteıik, buǵan deıin Bostandyq aýdanynyń turǵyndarymen kezdesýde megapolıs ákimi Erbolat Dosaev ardagerlerdi materıaldyq qoldaý bastamasyn usynǵan bolatyn.
Jeńis kúni qurmetine:
⮚ Uly Otan soǵysynyń 75 qatysýshysy men múgedekteri 1 mln. teńgeden birjolǵy tólem alady.
⮚ Jeńildikter men kepildikter boıynsha UOS qatysýshylary men múgedekterine teńestirilgen azamattar, UOS maıdangerleriniń jesirlerine, Aýǵanstandaǵy urys qımyldarynda qaza tapqan azamattardyń otbasylaryna, basqa memleketter aýmaǵyndaǵy urys qımyldarynyń ardagerleri, ıaǵnı 4544 adam 100 myń teńgeden tólem alady.
⮚ 10 myńnan astam azamatqa, onyń ishinde eńbek maıdanyna qatysýshylarǵa 50 myń teńgeden tólemder josparlanǵan.
Sondaı-aq, Qazaqstan Respýblıkasynyń aýmaǵynda sanatorlyq-kýrorttyq emdelý úshin ótemder qarastyrylǵan muqtaj azamattar sanattarynyń tizbesi keńeıtildi. Tólemder mereke kúnderine deıin júrgiziledi.
Budan bólek, depýtattar Almaty qalasynyń kólik ınfraqurylymyn damytý josparynyń jobasyn qabyldady.
Jospar sheńberinde «Qalqaman» stansıasynan «Barlyq» bazaryna deıin metropolıtenniń 5.2 km uzyndyǵymen birinshi jelisiniń úshinshi kezegin salý, Saın kóshesi men Móńke bı (Aqyn Sara) kóshesiniń qıylysynda kólik jolaıryǵyn salý kózdelgen.
Sonymen qatar, qalanyń 8 shaǵyn aýdanynda uzyndyǵy 140,4 km jol salý josparlanǵan, olardyń qatarynda Shapaǵat, Boraldaı, Terekti, Rahat-Mádenıet, Shuǵyla, Aqjar, Maıak, Mádenıet shaǵyn aýdandary bar. Uzyndyǵy 39,7 km bolatyn 10 magıstraldy kósheni tesý (tesip uzartý) júzege asyrylady.
Jalpy josparǵa sáıkes, ákimdik tarapynan jaqsy jáne qanaǵattanarlyq jaǵdaıdaǵy joldardyń úlesin 2025 jylǵa deıin 86%-dan 95%-ǵa deıin arttyrý josparlanýda.