Taraz qalasyndaǵy QR İİM Ulttyq ulanynyń «Ońtústik» óńirlik qolbasshylyǵyna qarasty 5513 áskerı bóliminiń sarbazy qatardaǵy Bahtıarhan Tursynhodjaev jeti tildi meńgergen. Qala ishinde qoǵamdyq tártipti qamtamasyz etý barysynda ol azamattarmen qazaq, ózbek, ázirbaıjan, orys, túrik, aǵylshyn jáne fransýz tilderinde erkin til tabysady.
Bahtıarhan fransýz tilin ákesimen birge Fransıada bolǵan kezinde meńgergen. Ol jerde arhıtektýra baǵyty boıynsha bilim alǵan. Shetelde qalyptastyrǵan tildik daǵdylary oǵan qyzmet barysynda azamattarmen tıimdi baılanys ornatýǵa jáne qoǵamdyq qaýipsizdikti qamtamasyz etý mindetterin sapaly oryndaýǵa kómektesip júr.
Otbasynyń úlkeni - Bahtıarhan 22 jasta. Ol artynan ergen inileri men qaryndasyna úlgi bolyp keledi. Jaýapkershilik, tártip pen ózin-ózi damytýǵa degen umtylys - onyń ómirlik ustanymy. Aıta keterligi, qaryndasy da shet tilderine qyzyǵyp, bes tildi meńgergen. Bul otbasyda ákeniń «Til bilgen adam ómirde óz jolyn tabady» degen tálimi naqty nátıjesin berip otyr.
Qatardaǵy Tursynhodjaevtyń aıtýynsha, bir tildi meńgerý úshin oǵan orta eseppen eki-úsh aı ýaqyt qajet. Merzimdi áskerı qyzmetin ótep júrse de, ol oqýyn toqtatpaıdy. Áskerı bólimniń komandırleri de sarbazdyń izdenisin qoldap, qajetti sheteldik ádebıetterdi tabýǵa kómektesedi.
Bahtıarhannyń jetistikteri tek til bilimimen shektelmeıdi. Ol ýshý-sanda sportynan sport sheberi, Qazaqstan Respýblıkasy chempıonatynyń qola júldegeri. Sport pen til úırený - onyń ómir saltynyń ajyramas bóligi.
Bos ýaqytynda Bahtıarhan qarýlas dostaryna shaǵyn til úırený sabaqtaryn ótkizip, óz bilimimen bólisedi. Bul ol úshin basqa tilde aýyzeki sóıleý deńgeıin jetildirýge múmkindik bolsa, endi biri úshin jańa tildi meńgerýge jasalǵan alǵashqy qadam.
QR İİM Ulttyq ulanynyń baspasóz qyzmeti