Almatyda polısıanyń servıstik ortalyqtarynyń jumysy zerdelendi

Tanysý praktıkasy aıasynda Almaty qalasy polısıa departamentiniń bastyǵy Aıdyn Kabdýldınov Alataý aýdandyq polısıa basqarmasyna, sondaı-aq Almaly jáne Alataý aýdandaryndaǵy polısıanyń servıstik ortalyqtaryna bardy. Sapar barysynda ishki ister organdaryndaǵy adamǵa baǵdarlanǵan modeldiń negizgi tetigi sanalatyn servıstik ortalyqtardyń jumysyna erekshe nazar aýdaryldy. Servıstik ortalyqtar azamattar men polısıa arasyndaǵy ózara is-qımyldy jeńil ári qoljetimdi etý maqsatynda qurylǵan. Búginde olar qaladaǵy árbir aýdanda jumys isteıdi jáne "qadamdyq qoljetimdilik" qaǵıdaty boıynsha uıymdastyrylǵan. Bul azamattardyń artyq ýaqyt joǵaltpaı, uzaq kezek pen kúrdeli rásimdersiz qajetti qyzmet alýyna múmkindik beredi. Polısıa departamentiniń bastyǵy azamattardy qabyldaý jaǵdaıymen, mamandar jumysynyń uıymdastyrylýymen, qyzmetterdiń qoljetimdiligimen, kelýshilerge arnalǵan navıgasıamen jáne servıstik qyzmet kórsetý deńgeıimen tanysty. Óz sózinde Aıdyn Kabdýldınov servıstik ortalyqtardyń jańa formattaǵy polısıanyń fılosofıasy ekenin atap ótti. — Servıstik ortalyqtar halyq úshin qurylǵan. Bul — qoljetimdilik, túsinikti navıgasıa, ashyqtyq jáne árbir azamatqa qurmetpen qaraý. Adam ózin ótinish berýshi retinde emes, zańda kózdelgen qyzmetti alýǵa kelgen azamat retinde sezinýi tıis, — dedi ol. Departament basshysynyń aıtýynsha, servıstik ortalyqtardyń basty ıdeıasy — jazalaýshy modelden kómek kórsetý jáne súıemeldeý modeline kóshý. — Bizdiń mindetimiz — tek quqyq buzýshylyqqa den qoıý emes, kúndelikti ómirlik jaǵdaılarda azamattarǵa qoldaý kórsetý. Qujatyn joǵaltty ma, anyqtama nemese keńes qajet pe, quqyqtaryn qorǵaý kerek pe — adam qaıda júginetinin jáne ol jerde onyń máselesi eskerýsiz qalmaıtynyn bilýi kerek. Ár aýdanda servıstik ortalyqtyń bolýy — bul memlekettiń sanaly qadamy. Polısıa azamattarǵa jaqyndaı túsedi. Ár aýdanda — óz ortalyǵy, óz kómek kórsetý alańy, — dep túıindedi Aıdyn Kabdýldınov. Polısıanyń servıstik ortalyqtary azamattarǵa qolaılylyq, qoljetimdilik jáne qurmet qaǵıdattaryna negizdelgen zamanaýı keńistik retinde damýyn jalǵastyrýda. Óıtkeni qaýipsizdik eń aldymen adamǵa degen qarym-qatynastan bastalady.