Ūlttyq qūryltaı otyrysynda Memleket basshysy Qasym-Jomart Toqaev Konstıtutsıyalyq reformany odan árí tereńdetu jónínde mańyzdy málímdeme jasady. Prezıdenttíń aıtuynsha, bastapqyda parlamenttík reforma ayasynda Ata zańnyń 40-qa juyq babyna ózgerís engízu josparlanǵan. Alaıda jūmys barysynda túzetuler kólemí áldeqaıda auqymdy ekení anyqtalǵan.
Memleket basshysy 2022 jylǵy konstıtutsıyalyq reforma kezínde Ata zańnyń 33 baby jańartylǵanyn eske saldy. Al aldaǵy ózgeríster būdan da keń auqymdy bolmaq.
– Bíz, shyn mánínde, jańa Konstıtutsıya qabyldaumen para-par qadam jasaǵaly tūrmyz. Sondyqtan Konstıtutsıyalyq komıssıya qūru turaly sheshím qabyldadym. Arnaıy Jarlyqqa erteń qol qoyamyn, – dedí Prezıdent.
Qasym-Jomart Toqaevtyń aıtuynsha, Konstıtutsıyalyq komıssıya qūramyna 100-den astam azamat enedí. Olardyń qatarynda Ūlttyq qūryltaı múshelerí, belgílí zańgerler, būqaralyq aqparat qūraldarynyń basshylary, aımaqtyq máslıhat tóraǵalary, qoǵamdyq keńes ókílderí jáne ózge de bílíktí mamandar bolady. Komıssıya jūmysyna Konstıtutsıyalyq sottyń tóraǵasy jetekshílík etedí.
Komıssıya barlyq ūsynysty jan-jaqty saraptap, qorytyp, naqty konstıtutsıyalyq ózgerísterdíń jobasyn ázírleıdí. Osydan keıín jalpyhalyqtyq referendum ótkízíletín uaqyt belgílenbek.
Sonymen qatar Memleket basshysy álemdegí kúrdelí geosayası jaǵdaıǵa qaramastan, Qazaqstanda sońǵy jyldary túbegeılí ózgeríster júzege asyrylǵanyn atap óttí.
– 2022 jylǵy konstıtutsıyalyq reformaǵa jáne Atom elektr stantsıyasyn saluǵa qatysty referendum kezínde halqymyzdyń basym kópshílígí mení qoldady. Men árbír sheshímdí elge qajettígí tūrǵysynan mūqıyat saralap qabyldaımyn, – dedí Qasym-Jomart Toqaev.
Prezıdent úshín azamattardyń ál-auqatyn arttyruǵa baǵyttalǵan naqty jūmystardyń bárínen mańyzdy ekenín jetkízdí. Onyń aıtuynsha, halyqtyń qamy, ūlt pen memlekettíń múddesí – basty qūndylyq.
– Aldaǵy uaqytta da elímízdí damytyp, Táuelsízdígímízdí nyǵaıtu jolynda bar kúsh-jígerímdí salamyn. Strategıyalyq baǵdarymdy únemí qoldap kele jatqan barsha halyqqa jáne osy zalda otyrǵan elímízdíń laıyqty azamattaryna shyn júrekten rızashylyǵymdy bíldíremín, – dedí Memleket basshysy.