Almaty Ońtústik Koreıadaǵy eń joǵary reıtıńke ıe jobalardyń biri «Meniń kishkentaı boıdaq jigitim» (SBS) teleshoýynyń túsirilim alańyna aınaldy. Ońtústik Koreıada mıllıondaǵan kórermeni bar baǵdarlama apta saıyn efırge shyǵady, - dep habarlaıdy aqshamnews.kz.
Túsirilimge tanymal koreı akterleri Pe Chon Nam, Lı Son Mın, Kım Son Gún jáne Kım Chon Sý qatysty. Baǵdarlama Almaty qalasy men óńirdiń negizgi týrısik nysandarynda, atap aıtqanda Kóktóbede, Shymbulaqta, Medeýde, Kók bazarda, Kólsaı kólderinde jáne ózge de kórnekti orynda túsirildi.
Almatyǵa arnalǵan shyǵarylym 2026 jyly aqpan aıynyń basynda SBS telearnasynan efırge shyǵarylady dep josparlanǵan.
«Meni bul óńirdiń Koreıada kezdespeıtin keń tynysty, tosyn tabıǵı kórinisteri erekshe qyzyqtyrdy. Almaty Koreıadan alys bolmasa da, mundaǵy tabıǵat múlde bólek áser qaldyrady. Bul aýasy taza, qala ómiri men tabıǵat bir-birimen tabıǵı úılesim taýyp, astasyp jatqan qala. Koreıamen salystyrǵanda, mundaǵy tabıǵat áldeqaıda aýqymdy ári tabıǵı qalpy jaqsy saqtalǵandaı áser syılaıdy», – dep jobanyń rejıser-operatory Almatynyń ózine erekshe áser etkenin jetkizdi.
Almatyda túsirilim tobyna Almaty Tourism Bureau komandasy qoldaý kórsetip, uıymdastyrý jumystaryn qamtamasyz etti. Joba halyqaralyq deńgeıdegi mańyzdy aqparattyq oqıǵaǵa aınalyp, sheteldik aýdıtorıanyń Almatynyń týrısik áleýetine degen qyzyǵýshylyǵyn arttyrdy.