Ulttyq quryltaı otyrysynda Memleket basshysy Qasym-Jomart Toqaev Konstıtýsıaǵa qatysty kásibı zańgerler tarapynan aıtylǵan usynystarǵa toqtaldy, - dep habarlaıdy Aqshamnews.kz
Prezıdenttiń aıtýynsha, Ata zańnyń keıbir normalaryn naqtylaı túsý qajettigi týyndap otyr.
Memleket basshysy, ásirese, Prezıdent ókilettigin berý jáne saılaý ótkizý máselesine nazar aýdardy. Qazirgi Konstıtýsıaǵa sáıkes, Prezıdent óz mindetin atqara almaıtyndaı jaǵdaı týyndasa, onyń ókilettigi qalǵan merzimge Senat tóraǵasyna beriletini belgili. Al Senat tóraǵasy da memleketti basqarýǵa múmkindigi bolmasa, Prezıdent ókilettigi zańda belgilengen tártippen ózge laýazymdy tulǵalarǵa ótedi.
Prezıdent bul jerde negizgi másele «qalǵan merzim» uǵymyna tireletinin atap ótti. Sebebi bul merzim alty aıǵa da, tipti alty jylǵa deıin sozylýy múmkin. Osyǵan baılanysty Memleket basshysy Konstıtýsıada Prezıdent merziminen buryn qyzmetinen ketken jaǵdaıda eki aıdyń ishinde kezekten tys saılaý ótkizý týraly norma naqty belgilenýi qajet ekenin aıtty.
Qasym-Jomart Toqaevtyń sózinshe, bul qadam halyqaralyq ozyq tájirıbege tolyq saı keledi. Prezıdent kez kelgen jaǵdaıda bılikke tek saılaý arqyly, ıaǵnı zańdy jolmen kelýi tıis.
– Elimizdiń kez kelgen basshysy bılikke saılaý arqyly kelýi kerek. Bul – men úshin myzǵymas ustanym. Bul norma keıingi memleket basshylary úshin de ózgermeıtin qaǵıda bolýy tıis, – dedi Memleket basshysy.
Prezıdenttiń bul bastamasy Konstıtýsıalyq normalardy naqtylap, eldegi bılik tranzıtiniń ashyq ári zańdy túrde júzege asýyna negiz bolmaq.