Memleket basshysy Qasym-Jomart Toqaev V Ūlttyq qūryltaı otyrysynda júk tasymaldaıtyn áue kompanıyasyn qūru jónínde būǵan deıín berílgen tapsyrmanyń tıístí deńgeıde oryndalmaı jatqanyn aıtyp, Úkímettíń sheshímín synǵa aldy.
Prezıdenttíń aıtuynsha, Qazaqstannyń jahandyq logıstıka kartasynan laıyqty oryn aluy úshín júıelí ūmtylys pen naqty áreket strategıyasy qajet. Osyǵan baılanysty Úkímetke avıatsıya salasynda, ásírese júk avıatsıyasy baǵytynda naqty nátıjege qol jetkízu míndetí qoıylǵan.
– Meníń oıymsha, elímízdíń osy uaqytqa deıín áuedegí júk tasymalynyń eurazıyalyq ortalyǵyna aınalmauy – keshírílmeıtín kemshílík. Qarapaıym tílmen aıtqanda, būl – absurd, – dedí Qasym-Jomart Toqaev.
Memleket basshysy Úkímettíń juyqta qabyldaǵan sheshímí būl máselení odan árí ushyqtyrǵanyn atap óttí. Onyń aıtuynsha, júk tasymaldaıtyn memlekettík áue kompanıyasyn qūruǵa qatysty qate sheshím qabyldanyp, būl míndet «Qazaqstan temír joly» ūlttyq kompanıyasyna júktelgen.
– Úkímet júk tasymaldaıtyn memlekettík áue kompanıyasyn qūru máselesínde dūrys emes sheshím qabyldady. Eger tapsyrmany oryndaı almasańyzdar, būl máselení jeke qūrylymdarǵa tapsyryńyzdar, – dedí Prezıdent.
Sondaı-aq Memleket basshysy jaqynda ótken keńeıtílgen jınalysta būl baǵyttaǵy basty kedergílerdíń bírí – avıatsıyalyq otyn baǵasy ekení anyqtalǵanyn aıtty. Onyń sózínshe, Qazaqstandaǵy avıakerosın qūny kórshí elderdíń áuejaılarymen salystyrǵanda básekege qabíletsíz.
– Shıkí mūnaı óndíretín eldíń avıakerosın baǵasy boıynsha mūnaı óndírmeıtín memlekettermen básekege túse almauy – aqylǵa syımaıdy. Būl da absurd emes pe? – dep atap óttí Qasym-Jomart Toqaev.
Prezıdent Úkímetke júk avıatsıyasy salasyndaǵy túıtkílderdí jedel sheshíp, naqty nátıje kórsetu qajettígín qadap aıtty.