Ulttyq ulannyń áskerı qyzmetshileri de el taǵdyryn sheshetin bul naýqannan tys qalmady. Áskerdiń jeke quramy óz tańdaýlaryn jasap, daýys berýdi aıaqtady.
Tańǵy saǵat 06.00-de Almatydaǵy 5571 áskerı bólimindegi №107 daýys berý ýchaskesine alǵashqylardyń biri bolyp Qazaqstan Respýblıkasy Ulttyq ulany «Ońtústik» óńirlik qolbasshylyǵynyń qolbasshysy, general-maıor Talapker Ámireev kelip, óz daýysyn berdi.
«Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystar jónindegi orynbasary polkovnık Nıaztaı Álkeshevtiń aıtýynsha, áskerı bólimderde ashylǵan saılaý ýchaskelerinde daýys berýshilerdiń belsendiligi óte joǵary boldy. Áskerı qyzmetshilerdiń jeke quramy ǵana emes, olardyń otbasy músheleri de saıası naýqanǵa túgel qatysqan.
Ulttyq ulannyń «Ońtústik» óńirlikke qarasty áskerı bólimderdegi Otan aldyndaǵy azamattyq boryshyn ótep júrgen jaýyngerler áskerı qalashyqtar aýmaǵynda ornalasqan 9 saılaý ýchaskesinde daýys berdi.
Olardyń arasynda daýys berýge alǵash ret qatysqandar kóp. 18-ge endi tolǵan, tuńǵysh ret daýys berý quqyǵyna ıe bolǵan jas sarbazdarǵa arnaıy syılyqtar tabystaldy. Tuńǵysh ret daýys berýshilerdiń biri – 5571 áskerı bólimindegi qatardaǵy Sanjar Tólegenov:
— Men táýelsiz Qazaqstannyń azamaty retinde elimizde oń ózgeristerdiń bolǵanyn qalaımyn. Sol úshin búgin azamattyq paryzymdy atqaryp, daýysymdy berdim, — deıdi.
— Biz daýys berýdi qorytyndyladyq. Áskerı bólimderdegi barlyq saılaý ýchaskesinde jeke quram elimizdiń bolashaǵy úshin óz daýystaryn berdi. Eshqandaı quqyq jáne ereje buzýshylyqtar anyqtalǵan joq, — dedi polkovnık Nıaztaı Álkeshev.
Aıta keteıik, «Ońtústik» óńirlik qolbasshylyǵyna qarasty áskerı bólimderde saılaý quqyǵy bar 9000-ǵa jýyq azamat qyzmet etedi.
