Abaı (Ibrahım) Qunanbaıulynyń týǵan kúnine oraı, ıaǵnı 175 jyldyq mereıtoıy qarsańynda 2020 jyldyń 4 tamyzy kúni Qazaqstan Respýblıkasy Úkimetiniń qaýlysymen 10 tamyz «Abaı kúni» bolyp belgilengen edi. Osynaý mereke qarsańynda Jetisý aýdanyndaǵy komúnıtı-ortalyǵynda «Qazaq analary – dástúrge jol» respýblıkalyq qoǵamdyq birlestiginiń Almaty qalasy, Jetisý aýdandyq fılıaly men «Amanat» partıasynyń Jetisý aýdandyq fılıalynyń uıymdastyrýymen «Abaıdyń sózi – qazaqtyń boıtumary» atty ádebı is-shara ótti.
Uly Abaı kúni aıasynda qazaqtyń salt-dástúrin, qasterli ulttyq qundylyqtaryn nasıhattap, ult bolashaǵyna alańdaǵan aq kımeshekti analar bas qosyp, qoǵamdaǵy jas urpaq tárbıesine qatysty ózekti máselelerdi ortaǵa saldy. Jas urpaqqa tárbıe berýdiń alǵysharty Abaıdyń danalyq qara sózderi ekenin ortaǵa salyp, oı bólisti.
Alǵashqy sóz kezegin Jetisý aýdany Ardagerler keńesiniń tóraıymy, qalalyq «Ájeler keńesiniń» tóraıymy Tamara Muhtarhanqyzy aldy.
– Biz úshin qazirgi ýaqyt óte kúrdeli. Jahandaný atty buryn-sońdy bolmaǵan ótpeli kezeńdi keship jatyrmyz. Biz osynaý qıyn da, jaýapty kezeńde óz qundylyǵymyzdy saqtap qalýymyz kerek. Bul rette «Tek aqyl, ǵylym, erik, ar-ujdan adamdy kóteredi» degen danalyq oıdyń ıesi, qazaq halqynyń uly aqyny, ult rýhanıatynyń temirqazyǵy Abaı babamyzǵa arqa súıep, qara sózine júginsek boldy der edim. Qazir uly Abaıdy tek qazaq halqy ǵana emes, álem túgel onyń danalyq qara sózderinen nár alyp jatyr. Shetelderde boı kóterip jatqan Abaı eskertkishteri tekke qoıylyp jatqan joq. Abaıdyń bastaý alǵan tárbıe bulaǵy – ájesi, ata-anasy, ósken ortasy boldy. Balaǵa áke – qamqor, asqar taý, súıenish, demeýshi bolsa, ana – meıirimi mol tárbıeshisi, ómirdegi durys ustanym bolmysynyń úlken sebepkerleri bolady, – deı kele, ákesi Muhtarhan Batyrhanovtyń Abaıǵa arnaǵan óleńderin oqyp berdi.
Kelesi kezekte «Qazaq analary – dástúrge jol» respýblıkalyq qoǵamdyq birlestiginiń Almaty qalasy jáne Almaty oblysy fılıalynyń tóraıymy Láıle Noǵaıqyzy sóz alyp, Abaıdyń «Qara sózderi» arqyly eńbek pen bilimge, izgilik pen parasatqa qol jetkizýge bolatynyn aıtyp, adamnyń rýhanı damýy men sananyń jańǵyrýy jolynda Abaı shyǵarmalary baǵa jetpes baılyq bolyp qalatynyna toqtaldy.
Kesh barysynda Asterhan Shoıynbaıqyzy, Botan Beketbaıqyzy bastaǵan analar Abaı Qunanbaıulynyń ádebı jáne mýzykalyq shyǵarmalaryndaǵy ózekti gýmanısik jáne aǵartýshylyq murattarǵa ıe progresıvti kózqarastary týraly oılaryn ortaǵa saldy. Uly danyshpannyń «Kózimniń qarasy», «Aıttym sálem, Qalamqas» atty ánderin shyrqaǵan analar is-sharany uıymdastyrǵan «Qazaq analary – dástúrge jol» respýblıkalyq qoǵamdyq birlestiginiń Almaty qalasy, Jetisý aýdany fılıal tóraıymy – Gúljazıra Dúısenqyzyna, Jetisý aýdany «Amanat» partıasy ıdeologıa bóliminiń mamany – Nurgúl Kerimqyzyna alǵystaryn bildirdi. Osylaısha «Qazaq analary – dástúrge jol» respýblıkalyq qoǵamdyq birlestiginiń aq kımeshek kıgen analary uly Abaıdy ulyqtap, ár sózinen marjan terip, áserli ánin shyrqap kóńildi tarqasty.
