Ulandyqtar saıası mańyzdy kúnde tys qalmady. Qazaqstan Respýblıkasy Ulttyq ulany «Ońtústik» óńirlik qolbasshylyǵy basqarmasynyń ujymy tikeleı efırden onlaın formatta Prezıdent Joldaýyn tyńdady.
«Ońtústik» óńirlik qolbasshylyǵynyń qolbasshysy general-maıor Talapker Ámireevtiń basshylyǵymen basqarmanyń ofıserleri men áskerı qyzmetshileri májilis zalyna jınalyp, Qazaqstan Respýblıkasy Prezıdentiniń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn tyńdap, óz qoldaýlaryn bildirdi.
Búgingi Joldaýda, Qazaqstan Respýblıkasy Qarýly Kúshteriniń Joǵarǵy Bas qolbasshysy qoǵamda zań men tártip ıdeologıasyn tereń ornyqtyrý qajetiligin atap ótti. Sonymen qatar áskerı qurylymdardaǵy tártipke de basty nazar aýdardy.
«Ásker qatarynda zań men tártiptiń saqtalýy – aıryqsha mańyzdy mindet. Jastar áskerge Otan aldyndaǵy boryshyn óteýge barady. Jas sarbazdarymyz óz mindetin alańsyz oryndaýy úshin ásker qatarynda, eń aldymen, temirdeı tártip bolýǵa tıis. Qarýly kúshter men basqa da kúshtik qurylymdar osy talapty múltiksiz oryndaýy qajet. Ár ata-ana áskerge ketken balasyn memleketke senip tapsyrady. Sondyqtan sarbazdardyń densaýlyǵy men qaýipsizdigine, eń aldymen, armıa basshylyǵy jáne quqyq qorǵaý mekemeleriniń basshylary jaýapty», – dedi Memleket basshysy.
Joldaýdan keıin «Ońtústik» óńirlik qolbasshylyǵynyń qolbasshysy general-maıor Talapker Ámireev basqarma jeke quramyna Prezıdenttiń júrgizip otyrǵan saıasatynyń mańyzdylyǵyn jalpylama túsindirip, ony júzege asyrýda basqarma basshylaryna birqatar tapsyrmalar qoıdy.
– Toǵyz baǵyttan turatyn bul Joldaý qazirgi jaǵdaıda aldymyzda turǵan basty mindetterdi sheshýde negizgi ról atqarady dep senemin. Aldaǵy ýaqytta, barlyq áskerı bólimderde Joldaýdy jan-jaqty túsindirý jumystary júrgiziletin bolady. Memleket basshysynyń jolaýyna qolaý bildire otyryp, quqyqtyq tártip áskeriniń jeke quramy da atalǵan mindetterge jetý úshin tabandy eńbek etetinine senim bildiremin, – dep atap ótti general-maıor Talapker Ámireev.
Memleket basshysynyń Joldaýyn júzege asyrý maqsatynda óńirlik qolbasshylyqqa qarasty barlyq áskerı bólimderde tıisti sharalar ótkiziletin bolady.
Aıta keteıik, mundaı is-shara qolbasshylyqqa qarasty barlyq áskerı bólimde de uıymdastyryldy.