QR Premer-Mınıstriniń m. a. Á. Smaıylov Memleket basshysynyń tapsyrmalaryn iske asyrý jóninde keńes ótkizdi, dep habarlaıdy almaty-akshamy.kz
QR Premer-Mınıstriniń mindetin atqarýshy Álıhan Smaıylov eldegi áleýmettik-ekonomıkalyq ahýal jónindegi keńeste QR Prezıdenti Qasym-Jomart Toqaevtyń alǵa qoıǵan mindetterin iske asyrý boıynsha birqatar tapsyrma berdi.
Á. Smaıylov Gaz salasyn damytýdyń keshendi josparyn pysyqtaýdy jáne Mańǵystaý oblysynda suıytylǵan gaz óndiretin zaýyt qurylysynyń tehnıkalyq-ekonomıkalyq negizdemesine memlekettik saraptama júrgizýdi jedeldetýdi tapsyrdy. Suıytylǵan gaz saýda-sattyǵyn uıymdastyrý men júrgizýdiń qoldanystaǵy qaǵıdalaryn pysyqtaý, suıytylǵan gazdy elektrondyq saýda alańy arqyly ótkizýge tolyq kóshýdi bir jylǵa aýystyrý.
Tıisti memlekettik organdar suıytylǵan gazdy ótkizý kezinde baǵalyq sóz baılasý jáne ózge de básekelestikke qarsy is-áreketterge qatysty tergeý júrgizsin. Batys óńirler – Mańǵystaý, Atyraý, Aqtóbe jáne Batys Qazaqstan oblystaryn damytýdyń keshendi josparlary ózektendirilisin.
Premer-Mınıstrdiń mindetin atqarýshy suıytylǵan gaz, benzın jáne dızel baǵalaryn 180 kún merzimge memlekettik retteýdi engizý boıynsha tıisti normatıvtik aktini qabyldaýdy tapsyrdy.
Múddeli memlekettik organdarǵa áleýmettik mańyzy bar azyq-túlik taýarlarynyń baǵalaryn memlekettik retteý tetigin engizý boıynsha qajetti sharalar qabyldaý tapsyryldy.
Indýstrıa jáne ınfraqurylymdyq damý, ulttyq ekonomıka, eńbek jáne halyqty áleýmettik qorǵaý mınıstrlikteri óńirlerdiń ákimdikterimen birlesip, halyqtyń áleýmettik osal toptary úshin qaıtalama turǵyn úıge jaldaý aqysyn sýbsıdıalaý máselesin pysyqtap, Úkimetke usynystar engizýi tıis.
Qarjy mınıstrligine múddeli memlekettik organdarmen birlesip «Jeke tulǵalardyń bankrottyǵy týraly» zań jobasyn ázirleý tapsyryldy. Densaýlyq saqtaý, bilim jáne ǵylym mınıstrlikteri densaýlyq saqtaý men balalar problemalaryn sheshý úshin «Qazaqstan halqyna» qoǵamdyq qoryn qurýdy qamtamasyz etsin.
«Memleket basshysy áleýmettik-ekonomıkalyq jaǵdaıdy turaqtandyrý boıynsha joǵaryda atalǵan sharalardy kidirissiz qabyldaýdy tapsyrdy», — dedi Á. Smaıylov.