QR Premer-Mınıstri Álıhan Smaıylovtyń ókimimen QR Úkimeti janyndaǵy Daǵdarysqa qarsy sharalar jónindegi jedel shtab quryldy, dep habarlaıdy Almaty-akshamy.kz Úkimet basshysynyń baspasóz qyzmetine silteme jasap.
Jedel shtab Reseı Federasıasyna sanksıalar paketiniń salynýyna jáne olardyń Qazaqstan ekonomıkasyna tıgizer áserine baılanysty ekonomıkadaǵy jáne bıznestegi problemalyq máselelerdi qarap, sheshetin bolady.
Jedel shtab quramyna negizgi memlekettik organdardyń birinshi basshylary, kásipkerlik qaýymdastyǵynyń ókilderi jáne salalyq sarapshylar kirdi.
Sonymen qatar Jedel shtabtyń aldaǵy jumysyna otandyq bıznes pen sarapshylar qaýymdastyǵynyń basqa da ókilderi qatysa alady.
Búgin QR Premer-Mınıstriniń birinshi orynbasary Roman Sklárdyń tóraǵalyǵymen Jedel shtabtyń alǵashqy otyrysy ótti. Onda kólik jáne logıstıka, kontragentter arasyndaǵy ózara esep aıyrysý máseleleri, sondaı-aq otandyq bıznestiń basqa da máseleleri talqylandy.